Babykin (źleva) i Ivanoŭ
Sud prachodziŭ u Pałtaŭskaj vobłaści.
Abvinavačvańnie zapytvała dla Alaksandra Babykina i Alaksandra Ivanova pa 12 hadoŭ źniavoleńnia. Abodva pryznali svaju vinu ŭ sudzie i raskajalisia.
Abodva jany z Murmanskaj vobłaści, 23-hadovy Ivanoŭ byŭ navodčykam ustanoŭki załpavaha ahniu «Hrad», 27-hadovy Babykin — kiroŭcam zaradžalnaj mašyny.
Pieršy załp jany zrabili z terytoryi Rasii ŭnačy z 23 na 24 lutaha. Zatym pierasiekli miažu Ukrainy i druhi streł zrabili ŭžo ź jaje terytoryi. Im paviedamili, što stralali jany pa Charkavie, ale pra nastupstvy abstrełaŭ ničoha nie raspaviali. Pa słovach vajskoŭcaŭ, u składzie ich častki było 18 «Hradaŭ», kožny ź jakich zrabiŭ pa 40 załpaŭ — heta značyć bolš za 700 strełaŭ.
Va Ukrainie kałonu Babykina i Ivanova pačali abstrelvać. Jak raspaviadaŭ paźniej u intervju Babykin, niekalki mašyn było raźbita. Ivanoŭ z kalehami pasprabavaŭ syści lasami ŭ bok trasy ŭ Rasiju, ale praz sutki zdaŭsia ŭ pałon. Babykin, jaki byŭ paranieny, 10 dzion adsiedžvaŭsia spačatku ŭ pakoi achovy ŭ pustym sanatoryi, jaki sustreŭsia jamu pa šlachu, a zatym u čužoj kvatery, kudy zalez praz akno. Paśla hetaha jon taksama zdaŭsia ŭ pałon.