Fota: TASS
Pavodle vydańnia, na jakoje spasyłajecca «Radyjo Svaboda», pamiežnaja słužba ŭ svaich paviedamleńniach značna pierabolšvaje maštaby mihracyi na miažy ź Biełaruśsiu.
Hihanckaja roźnica ŭ danych
U studzieni na sajcie Pamiežnaj słužby źjaviłasia paviedamleńnie, pavodle jakoha letaś polska-biełaruskuju miažu sprabavali pierasiekčy 39697 hramadzian trecich krain. U toj ža čas Frontex — ahienctva ES pa źniešnich miežach supolnaści i sajuźnikaŭ — śćviardžaje, što za ŭvieś 2021 hod tolki 8099 hramadzian trecich krain pierasiekli ŭsie ŭschodnija miežy ES, za vyklučeńniem pamiežnych pierachodaŭ. Heta ŭ piać razoŭ mienš.
Uschodniaja suchaputnaja miaža ES, pra jakuju kaža ŭ svaich danych Frontex, heta linija ŭ 6000 kiłamietraŭ, jakaja złučaje miežy Narviehii (nie ŭ ES, ale supracoŭničaje z Frontex), Finlandyi, Estonii, Łatvii, Litvy, Polščy, Słavakii, Vienhryi i Rumynii z Rasijaj, Biełaruśsiu, Ukrainaj i Małdovaj. Polska-biełaruskaja miaža — heta tolki nievialikaja jaje častka.
Žurnalist haziety Jarasłaŭ Kopeć paprasiŭ abiedźvie ŭstanovy patłumačyć hetuju nieadpaviednaść. «I vyjaviłasia, što sprava ŭ inšym — u čymści, što moža być albo pamyłkaj, albo prosta chłuśnioj», — piša žurnalist.
Jak ličyć Pamiežnaja słužba
Vydańnie spytała ŭ Frontex, adkul uziałasia nieadpaviednaść. Sprava ŭ tym, što hetaja ŭstanova atrymlivaje danyja ŭstanoŭ u asobnych dziaržavach-čalcach, tamu jany nie mohuć adroźnivacca ad nacyjanalnych danych. Tam adkazali, što pamiežnaja słužba ŭkazała nie kolkaść ludziej, a kolkaść sprobaŭ pierasiačeńnia miažy. Dla dalejšych tłumačeńniaŭ pres-sakratar Frontex nakiravaŭ polskuju hazietu ŭ Pamiežnuju słužbu.
Paśla pierapiski z v.a. pres-sakratarki Pamiežnaj słužby Polščy Hannaj Michalskaj situacyja prajaśniłasia.
Nazyvajučy ličbu ŭ 39697 čałaviek, PS nie mieła na ŭvazie kolkaść kankretnych asobaŭ (choć u paviedamleńniach jany pisali, što heta mienavita kolkaść hramadzian). Heta była kolkaść sprobaŭ pierasiačeńnia miažy pa-za pamiežnymi pierachodami.
Što majecca na ŭvazie pad hetym terminam? Pavodle tłumačeńniaŭ pamiežnikaŭ, u hetuju ličbu ŭvachodziać navat takija vypadki, kali niechta prosta stajaŭ na biełaruskim baku miažy i byŭ papiaredžany polskimi pamiežnikami, što jaho nie ŭpuściać. Navat kali taki mihrant sychodziŭ ad miažy, nie sprabujučy jaje pierajści, jon usio roŭna zaličvaŭsia ŭ statystyku.
Jak patłumačyła pres-sakratarka Pamiežnaj słužby, časam takija hrupy byli davoli šmatlikija. Pa miery taho jak udzielniki takich hrup razychodzilisia i sprabavali pierasiekčy miažu mienšymi hrupami, ich znoŭ padličvali. Kali ich prymusova adpraŭlali na miažu paśla pierachodu, časam pa niekalki razoŭ, jany znoŭ rehistravalisia.
Pradstaŭnica Pamiežnaj słužby paviedamiła, što «kačavyja hrupy», takija, jak kala pierachodu ŭ Kuźnicy, i ludzi, jakija sprabavali prarvacca praź miažu, nie ŭličvalisia.
Dyk kolki było mihrantaŭ na biełaruska-polskaj miažy
Gazeta Wyborcza pacikaviłasia ŭ pamiežnikaŭ pra hramadzianstva ludziej, jakich zatrymali ŭ 2021 hodzie.
«U 2021 hodzie paśla pierasiačeńnia zialonaj miažy ź Biełaruśsiu supracoŭniki pamiežnaj słužby zatrymali 2744 mihrantaŭ, u asnoŭnym ź Iraka (1557), Afhanistana (447), Siryi (269), Rasii (69), Samali (68), Irana (55), Turcyi (54) i Tadžykistana (51) i inšaha hramadzianstva (adzinkavyja vypadki)».
Z hetych danych vydańnie robić vysnovu, što ŭsich mihrantaŭ było nie mienš za 2744 čałavieki (mienavita stolki čałaviek zatrymali supracoŭniki pamiežnaj słužby).
Maksimum — 8099 (mienavita takuju ličbu paviedamlaje Frontex), ale hetaja ličba tyčycca ŭsioj uschodniaj miažy ES i partnioraŭ).
«Jość, viadoma, vierahodnaść, što hetych ludziej było bolš. Aficery mahli zaŭvažyć nie ŭsich. Adnak kolkaść sprobaŭ niezakonnych parušeńniaŭ, pryviedzienaja na sajcie Pamiežnaj słužby jak kolkaść hramadzian, nie adpaviadaje rečaisnaści», — padsumoŭvaje Gazeta Wyborcza.
