Uviečary 11 lipienia na składach bojeprypasaŭ rasijskich akupantaŭ u Novaj Kachoŭcy prahrymieła sieryja vybuchaŭ.
Miascovyja žychary paviedamili, što pažar na pazicyjach rasijskich vojskaŭ uźnik, vierahodna, z pryčyny patraplańnia rakiet. Paźniej hetuju infarmacyju paćvierdzili pres-sakratar Adeskaj Abłasnoj vajennaj administracyi Siarhiej Bratčuk i daradca kiraŭnika Chiersonskaj abłasnoj vajennaj administracyi Siarhiej Chłań.
Rasijskija ŚMI spačatku śćviardžali, što rakiety patrapili ŭ Kachoŭskuju HES, ale paśla ad hetaj viersii admovilisia i stali śćviardžać, što USU rakietami dalnabojnaha RSZA HIMARS nibyta źniščyli skład z «saletraj». Pry hetym prapahandysty śćviardžajuć, što ŭdar byŭ naniesieny pa žyłym kvartale, paciarpieli rynak, balnica i žyłyja damy. Adnak paćvierdžańniaŭ hetamu nijakich niama.
U načnoj zvodcy Apieratyŭnaha kamandavańnia USU «Poŭdzień» infarmacyju pra źniščeńnie składoŭ u Novaj Kachoŭcy paćvierdzili. Akramia taho, u joj pieraličyli i inšyja pośpiechi USU, dasiahnutyja za dzień na paŭdniovym froncie:
«Pa vynikach vykanańnia našymi rakietna-artyleryjskimi padraździaleńniami ahniavych zadač, vorah straciŭ 5️2️ rašysty, haŭbicu «Msta-B», minamiot, 7️ adzinak braniavanaj i aŭtamabilnaj techniki, a taksama skład z bojeprypasami ŭ Novaj Kachoŭcy», — havorycca ŭ paviedamleńni kamandavańnia.
Akramia taho, šturmavikami USU byli nibyta naniesienyja try avijacyjnyja ŭdary pa składach bojeprypasaŭ u Mikałajeŭskaj vobłaści, a viertalotami — pa apornych punktach praciŭnika. Straty praciŭnika ad udaraŭ avijacyi ŭdakładniajucca.
