Padalak skazaŭ, što ciapier na deakupavanych terytoryjach buduć pravodzicca pravierki nasielnictva na pradmiet supracoŭnictva z akupacyjnymi ŭładami. Na jaho dumku, jak takoha kałabaracyjanizmu, jaki maje dakładnaje jurydyčnaje vyznačeńnie, na akupavanych terytoryjach niašmat.
Padalak ličyć, što, u asnoŭnym, heta ludzi, jakija nie znajšli siabie — aŭtsajdary, niaŭdačniki, ludzi z kryminalnymi schilnaściami, tyja, jakija niapravilna razumiejuć sučasnaje ŭładkavańnie śvietu.
U prykład Padalak pryvioŭ Siarhieja Aksionava, Kiryła Stramavusava, Dzianisa Pušylina, jakija stanavilisia lidarami akupacyjnych administracyj, naŭmysna išli na supracoŭnictva z akupacyjnaj uładaj, prajaŭlali inicyjatyŭnaść, zdavali ludziej z praŭkrainskimi pohladami, «stali zdradnikami ŭ samym vulharnym sensie».
Takija ludzi, jakija naŭmysna išli na supracoŭnictva z rasijanami, zaniali pasady ŭ strukturach akupacyjnaj ułady, buduć asudžanyja na roznyja terminy rašeńniem suda, prahnazuje Padalak.
Jon taksama pryvioŭ prykład, jak za niekalki dzion da vyzvaleńnia Charkaŭskaj vobłaści niekatoryja ludzi ŭdzielničali ŭ prapahandysckich mierapryjemstvach, raskazvali, «jak mocna jany chočuć atrymać rasijski pašpart».
«Biezumoŭna, heta ŭśviadomlenaja pazicyja, jakaja vyrazna kaža pra toje, što jany svoj vybar zrabili. Ideałahična dla ich Ukrainy jak dziaržavy nie isnuje, jany padtrymlivajuć kancepcyju Pucina, što takoj krainy niama, jany publična adraklisia hramadzianstva Ukrainy, pakazali, što hatovyja supracoŭničać z akupantami. Da ich buduć užytyja, viadoma ž, jurydyčnyja narmatyvy. Heta značyć, u zaležnaści ad ciažkaści złačynstva, jakoje budzie interpretavanaje jak dziaržaŭnaja zdrada, jany buduć atrymlivać tyja ci inšyja terminy», — skazaŭ jon.
Rabotniki sacyjalnaj śfiery — daktary, nastaŭniki, pa słovach Padalaka, buduć prachodzić sumoŭje.
Jon kaža, što čałaviek moh pracavać u sacyjalnaj śfiery, ale pry hetym «inicyjatyŭna paviedamlać», što niejki jaho kaleha havoryć drenna pra Rasiju, raspaŭsiudžvaje «fejki» pra rasijskaje vojska.
«Toje, što jon nie pracavaŭ u akupacyjnaj administracyi, nie zdradziŭ svajoj krainie, — kaža Padalak. — Kali čałaviek zdavaŭ susiedziaŭ, pisaŭ danosy — nieabchodna da tych ludziej prymianiać jurydyčnyja narmatyvy».
Asobnaje pytańnie žurnalist zadaŭ pra nastaŭnikaŭ, jakija pracavali na akupavanych terytoryjach i vykładali pavodle rasijskich prahram.
Padalak skazaŭ, što heta važnaje pytańnie.
«Hety piedahoh žyŭ va Ukrainie i razumieje, što tut adbyvałasia. I voś jon vychodzić da dziaciej i pačynaje raspaviadać, što Rasija — heta vydatnaja kraina, što my sami spravakavali vajnu, što tut niejkija bijałabaratoryi, tut NATA i amierykancy. Hety čałaviek nie moža bolš pracavać nastaŭnikam», — kaža Padalak.
Jon arhumientuje heta tym, što taki nastaŭnik paviedamlaŭ zahadzia łžyvuju infarmacyju, jon prymaje dla siabie fejkavuju historyju, jakuju sprabuje danieści da dziaciej i takim čynam paŭpłyvać na vychavańnie dziaciej.
Na dumku Padalaka, heta značna bolš niebiaśpiečnaje złačynstva, navat čym supracoŭnictva z administracyjaj. «Tamu što jon naŭmysna skažaŭ tyja padziei, jakija adbyvajucca va Ukrainie, apraŭdvaŭ vajennyja złačynstvy i takim čynam łamaŭ psichiku maładoha pakaleńnia»
«Heta našmat bolš niebiaśpiečnaja historyja. Ja dumaju, što voś hetyja ŭsie historyi buduć razhladacca indyvidualna», — kaža Padalak.
Jon ličyć, što ŭ padobnych vypadkach ukrainskim uładam budzie značna składaniej pracavać, tamu što jurydyčnaj traktoŭki tut nie budzie — budzie «sacyjalnaja traktoŭka».
«Čałaviek u hetym rehijonie naŭrad ci zastaniecca pracavać», — dadaje jon.
Padalak ličyć, što takija historyi nie buduć masavymi.
«Ja dumaju, što na praktycy akažacca, što 90% nastaŭnikaŭ abo admovilisia vychodzić na pracu, abo admovilisia pracavać pa mietodykach. A voś hetyja 10% štrejkbrechieraŭ, kałabarantaŭ z nastaŭnikaŭ, ja dumaju, što jany znachodziacca ŭ hetym karavanie, jaki źjazdžaje ŭ bok u Rasijskaj Fiederacyi», — skazaŭ Padalak.
Čytajcie taksama:
Rasijski bok paviedamlaje, što rasijskich piedahohaŭ va Ukrainie nie zatrymlivali, ale kryminalnuju spravu pa hetym fakcie zavioŭ
