NYT piša, što Ukraina zaraz maje pieravahu jak u dalokaści stralby, tak i ŭ vysokadakładnych rakietach i artyleryjskich snaradach, jakich u značnaj stupieni brakuje Rasii.
Ukrainskija vajskoŭcy źniščajuć braniatechniku koštam u miljony dołaraŭ z dapamohaj tannych ułasnych bieśpiłotnikaŭ, a taksama bolš daskanałych dronaŭ i inšaha ŭzbrajeńnia, nadadzienaha ZŠA i sajuźnikami.
«Rasijskija ŭzbrojenyja siły zastajucca hroznaj siłaj z kryłatymi rakietami, značnaj armijaj i miljonami artyleryjskich snaradaŭ, choć i niedakładnych. … Adnak nielha nie zaŭvažyć, što situacyja na paŭdniovym froncie mianiajecca», — havorycca ŭ artykule.
Tam adznačajecca, što ŭsio bolšaja pieravaha Ukrainy ŭ artyleryi zrabiła mahčymym pavolnaje prasoŭvańnie na poŭdni ŭ kirunku Chiersona.
Vydańnie adznačaje, što kali letam u Danieckaj vobłaści Rasija vypuskała prykładna 10 artyleryjskich snaradaŭ na kožny ŭkrainski snarad, to ciapier u Chiersonskaj vobłaści ŭkrainskija kamandziry havorać, što baki vypuskajuć prykładna adnolkavuju kolkaść snaradaŭ, ale ŭkrainskija ŭdary nie tolki majuć bolšuju dalokaść, ale i źjaŭlajucca bolš dakładnymi dziakujučy spadarožnikavamu naviadzieńniu rakiet i artyleryjskim snaradam, pradstaŭlenym Zachadam.
«My dabivajem da ich, a jany da nas nie dabivajuć», — skazaŭ major Alaksandr, kamandzir artyleryjskaj batarei na chiersonskim kirunku.
Pavodle jaho słoŭ, źnižeńnie intensiŭnaści rasijskich abstrełaŭ taksama śviedčyć ab niedachopie bojeprypasaŭ.
«Bytuje mierkavańnie, što rasijskaje vojska maje nieabmiežavanyja resursy, ale heta mif… Intensiŭnaść ahniu źniziłasia ŭtraja. Vajavać ź imi realna», — zapeŭniŭ major.
