Viła Skvarcovych. Fota: Expressen
Siamiejnuju paru z Rasii Siarhieja Skvarcova i Alenu Kulkovu padazrajuć u špijanažy suprać ZŠA i Šviecyi na karyść Rasii. Centr «Daśje», šviedskaja hazieta Expressen i estonskaje vydańnie Delfi raźbiralisia, čym na samaj spravie zajmalisia rasijskija «nielehały» ŭ Šviecyi.
Siarhiej Skvarcoŭ i Alena Kulkova
Jany žyli ŭ Šviecyi z 1999 hoda i, akramia rasijskaha, majuć šviedskaje hramadzianstva. U abaich — adukacyja ŭ śfiery elektroniki. Siarhiej Skvarcoŭ, paśla zakančeńnia Maskoŭskaha enierhietyčnaha instytuta, pracavaŭ u NDI «Uschod» — «stratehičnym partniory dziaržavy ŭ halinie infarmacyjnych technałohij» — i saviecka-amierykanskim pradpryjemstvie «Dyjałoh».
Vobšuk na vile. Fota: Expressen
Da aryštu sužency žyli, zdavałasia b, zvyčajnym žyćciom u cichim pryharadzie Stakholma. Tudy jany pierajechali ŭ 2015 hodzie, naźbiraŭšy na ŭčastak ziamli i viłu la voziera. Da hetaha muž i žonka žyli ŭ kvatery ŭ nie samym prestyžnym rajonie stalicy.
Pa słovach znajomaha siamji, ź jakim parazmaŭlała Expressen, Skvarcoŭ časta jeździŭ u Maskvu na pracu. Da 2011 hoda jon atrymlivaŭ piensijonnyja vypłaty ad rasijskaj kampanii, što vynikaje z vypiski piensijonnaha fondu.
Jon taksama vałodaŭ niekalkimi kampanijami i kvateraj u Maskvie.
Pa danych vydańniaŭ The Insider i Bellingcat, pa adnym z adrasoŭ rehistracyi Skvarcova, Kulkovaj i jaje dački Hanny — vuł. Zorhie, d. 36 u Maskvie — ź imi susiedničali niekalki supracoŭnikaŭ HRU, u tym liku hienierał-major Dzianis Siarhiejeŭ, jaki prymaŭ udzieł u atručvańni eks-aficera HRU Siarhieja Skrypala i jaho dački Julii.
U Šviecyi Hanna Run-Kulkova, pavodle źviestak rasśledavalnikaŭ, žyła z byłym kiraŭnikom adnaho z adździełaŭ šviedskaj vajennaj raźviedki.
U adnoj z sacsietak Skvarcoŭ paznačany ŭ jakaści dyrektara kampanii BDT Stockholm AB, jakaja śpiecyjalizujecca na vytvorčaści, teściravańni, eksparcie i imparcie elektronnych kampanientaŭ. Aproč inšaha, kampanija zajmałasia ekspartam u Rasiju.
Hetaja šviedskaja kampanija — tolki adno źviano bujnoj rasijskaj sietki, jakaja zakuplaje padsankcyjnyja technałohii i kamplektujučyja dla rasijskaj vajennaj pramysłovaści. Da takoj vysnovy centr «Daśje» pryjšoŭ, vyvučyŭšy ŭładalnikaŭ i suviazi kampanij Skvarcova.
Aproč firmy BDT Stockholm AB, sa Skvarcovym afilavanyja jak minimum dźvie šviedskija kampanii. Pry bližejšym razhladzie, kožnaja zadziejničana ŭ zabłytanym pavucińni adnajmiennych struktur i afilavanych asob, nitački ad jakich viaduć da rasijskaj vajennaj pramysłovaści.
Bolš padrabiazna čytajcie tut.