«Uładalnik inšaha rachunku prosta nie vyjšaŭ na suviaź»
— Čaćviortaha krasavika 2022 hoda ja pieravodziła 320 rubloŭ sa svajoj karty Alfa-Banka na svaju kartu Banka BiełVEB. Pieravodziła ŭ dadatku Alfa-Banka, ale praz ARIP, bo praz ARIP papaŭnieńnie kart bankaŭ biez kamisii. Ja rabiła heta ŭžo sto razoŭ, ja aktyŭny karystalnik kart, rabiła pieravody pamiž imi i była ŭpeŭnienaja, što ŭsio budzie dobra, — tłumačyć Maryna.
Dalej jana ŭbačyła ŭ dadatku numar bankaŭskaha rachunku i padumała, što heta numar jaje rachunku ŭ Banku BiełVEB.
— Ja pravieryła apošnija 5—6 ličbaŭ rachunku, jany supadali z maim. I ja pieraviała «sabie» 320 rubloŭ. Zvyčajna hrošy prychodziać chutka, tamu, kali ich nie było 10—15 chvilin, ja ŭžo pačała niervavacca. Praz hadzinu ja ŭžo telefanavała ŭ Bank BiełVEB daviedacca, ci prychodzili hrošy, u ARIP, u Alfa-Bank.
Alfa-Bank adkazaŭ, što ź ich boku pamyłak niama, płaciež zrobleny. U ARIPie taksama skazali, što płaciež paśpiachova praviedzieny. A Bank BiełVEB śćviardžaŭ, što na moj rachunak hrošaj nie pastupała. Ja vyrašyła čakać sutki (ci mała, byvajuć zatrymki ŭ prahramnym zabieśpiačeńni, raptam patrapiła na taki zboj).
Praz sutki, tak i nie ŭbačyŭšy hrošaj na rachunku, ja stała detalova vyvučać ček i zrazumieła, što pieršyja ličby ŭ doŭhim bankaŭskim rachunku nie supadajuć. I tut zrazumieła: ja pieraviała hrošy nie na svoj rachunak.
Jak vypravić pamyłku?
Maryna źviarnułasia ŭ abodva banki, kab daviedacca, jak možna viarnuć hrošy.
U Alfa-Banku ŭdakładnili, što hrošy ŭ hetym vypadku mohuć być viernutyja čałaviekam, na rachunak jakoha jany pastupili abo ŭ sudovym paradku. «Hrašovyja srodki nie padlahajuć viartańniu z boku Alfa-Banka», — havorycca ŭ liście, atrymanym Marynaj.
Ad Banka BiełVEB pryjšoŭ padobny adkaz: «Bank i niabankaŭskaja kredytna-finansavaja arhanizacyja nie majuć prava <…> vyznačać i kantralavać napramki vykarystańnia hrašovych srodkaŭ uładalnika rachunku, a taksama ŭstanaŭlivać inšyja abmiežavańni jaho pravoŭ pa rasparadžeńni hrašovymi srodkami, jakija nie praduhledžany zakonam Respubliki Biełaruś abo dahavoram biahučaha (raźlikovaha) bankaŭskaha rachunku».
A što atrymalnik srodkaŭ? Sam jon nie źviartaŭsia ŭ bank i nie šukaŭ taho, chto pieraličyŭ jamu niečakanyja hrošy. A pa tych kantaktach, jakija jon pakinuŭ u banku, jaho nie znajšli.
«Uładalnik rachunku pa pytańniach pamyłkova (nie pa pryznačeńni) zaličanych hrašovych srodkaŭ u bank nie źviartaŭsia. Varta adznačyć, što bankam zrobleny nieadnarazovyja biezvynikovyja sproby źviazacca z uładalnikam rachunku. Pa najaŭnych kantaktach dadzienaja asoba niedastupna», — tłumačać u banku. A heta značyć, što hrošy zaraz možna budzie viarnuć tolki praz sud.
Jak časta ŭvohule adbyvajucca takija situacyi, kali hrošy pa niaŭvažlivaści sychodziać na rachunak inšaha čałavieka, skazać składana, takoj statystyki ŭ adkrytym dostupie niama. Onliner raskazvaŭ historyju čytača Juryja, jaki pavinien byŭ zakinuć na kartu znajomaj 90 rubloŭ doŭhu. Proźvišča i imia atrymalnika jon ukazaŭ dakładna, ale pierabłytaŭ ličby karty — i hrošy syšli ŭ nieviadomaść. U vyniku ich udałosia viarnuć ad atrymalnika płaciažu praz sud.
Vidavočna, što takich historyj, jak u Maryny i Juryja, kali syšlisia čałaviečy faktar i niaŭvažlivaść, bolš za dźvie. Biełaruskija banki majuć prykłady, kali jany telefanavali klijentu, jaki pamyłkova atrymaŭ hrošy, i toj hatovy byŭ adrazu ž dobraachvotna viarnuć ich. Ale moža być takoje, što ŭładalnik rachunku nie adkazvaje na telefonnyja zvanki.
A časam u hetaj situacyi padazronym moža akazacca i sam adpraŭščyk hrošaj: kali jon śćviardžaje, što pamyliŭsia ŭ pieravodzie, ale «pravilny» i «niapravilny» rachunki adroźnivajucca tak, što pierabłytać ich składana.
Ciapier u pytańni viartańnia pamyłkova adpraŭlenych hrošaj dadałosia bolš detalaŭ: 29 listapada ŭstupiła ŭ siłu abnoŭlenaja instrukcyja ab bankaŭskim pieravodzie. U joj havorycca, što inicyjuje viartańnie hrošaj toj, chto dapuściŭ pamyłku. Dla hetaha pavinien źviarnucca z zajavaj u bank adpraŭščyk pieravodu.
Tady bank — atrymalnik pieravodu — nakiruje zajavu klijentu, na karyść jakoha pamyłkova pieraviali hrošy, i toj abo zhadžajecca viarnuć srodki abo nie. Instrukcyja kaža, što kali pamyłkova pieraličanyja na rachunak hrošy nie viernuty całkam za 15 dzion z dnia pastupleńnia zajavy, ich viartańnie adbyvajecca ŭ sudovym paradku.
Pry hetym bank-atrymalnik nie adkazvaje za rašeńni, jakija prymaje klijent nakont viartańnia hrošaj, jakija jamu pamyłkova pieraličyli. Hetak ža jon nie kantraluje pamier sumy, jakaja viartajecca, a pry žadańni jaje možna viartać častkami.
Što dalej?
Z momantu pamyłkovaha pieravodu Maryny prajšło dzieviać miesiacaŭ, ale pakul sud nie pryniaŭ zajavu — patrebnyja danyja taho, chto atrymaŭ jaje hrošy.
— Ja pajšła ŭ milicyju i napisała zajavu ab razhladzie z nahody prysvajeńnia nie viadomaj mnie asobaj hrašovych srodkaŭ.
Adnačasova źviarnułasia ŭ sud Savieckaha rajona. Zajavu pryniali, paźniej pryjšoŭ adkaz, što dla razhladu zajavy i inicyjavańnia sudovaha pracesu nieabchodna ŭkazać danyja adkaźnika, jaho adras, telefon, elektronnuju poštu. Kali ja hetyja danyja nie padam, sud viernie maju zajavu i pakinie jaje biez razhladu. Što i adbyłosia praz tydzień, bo hetyja danyja mnie byli nieviadomyja.
Danyja čałavieka, na čyj rachunak syšli hrošy, milicyja pavinna atrymać ad banka, i tolki tady možna budzie źviarnucca ŭ sud.
Kali vy patrapili ŭ padobnuju situacyju i płanujecie iści ŭ sud, majcie na ŭvazie, što treba budzie vypłačvać dziaržpošlinu. Pry razhladzie iskavaj zajavy pa majomasnych sprečkach jana raźličvajecca ŭ pamiery 5% ad cany isku, ale nie mienš za dźvie bazavyja vieličyni (1 BV ciapier składaje 32 rubli). U vypadku Maryny dziaržpošlina składzie 64 rubli.
— Zaraz ja znoŭ čakaju, i nieviadoma, kali i čym heta skončycca. Ale ja pajdu da kanca — zanadta šmat sił, niervaŭ i času heta ŭžo zabrała, kab apuskać ruki na pałovie šlachu.
