Blizicca čas Božaha Naradžeńnia, a heta značyć, što ŭ Biełaruś prybudzie śviatło ź Viflejema, zapalenaje ad niazhasnaj łampady ŭ bazilicy Naradžeńnia Chrysta. Viflejemski ahoń prybyvaje śpiecyjalnym rejsam u Vienu, adkul pieradajecca z ruk u ruki pa krainach Jeŭropy i Paŭdniovaj Amieryki.
U našaj krainie jaho dastaŭkaj zajmajucca katalickija skaŭty — parafijalnyja hrupy dziaŭčat i junakoŭ, jakija viaduć svaju dziejnaść u Hrodnie, Iviancy, Minsku i Połacku.
Pieršaja akcyja Viflejemskaha śviatła miru pravodziłasia ŭ 1986 hodzie. Tady pradstaŭniki aŭstryjskaj teleradyjokampanii ŭpieršyniu dastavili zapalenuju na miescy Naradžeńnia Chrysta łampadu, kab padtrymać chvorych i samotnych ludziej napiaredańni śviata Božaha Naradžeńnia. Hetuju inicyjatyvu padchapili aŭstryjskija skaŭty.
Užo praz hod pieradśviatočnaja akcyja stała mižnarodnaj. Na aficyjnym uzroŭni akcyju pieradačy Viflejemskaha ahniu padtrymlivajuć jak kiraŭniki chryścijanskich cerkvaŭ Jeŭropy, tak i pradstaŭniki dziaržaŭnych uładaŭ roznych krain.
Upieršyniu ŭ Minsk Viflejemski ahoń byŭ dastaŭleny na Kalady 1994 hoda. U 1998 hodzie jon byŭ pieradzieny ŭ 22 krainy Jeŭropy, siarod jakich była i Biełaruś. Heta padzieja adbyłasia dziakujučy siabram polskaha zhurtavańnia skaŭtaŭ ZHP. U 2008 hodzie da akcyi ŭpieršyniu dałučylisia skaŭty z katalickich parafijalnych supolnaściaŭ Biełarusi.
19 śniežnia pradstaŭniki polskaha zhurtavańnia skaŭtaŭ ZHP uračysta pieradaduć ahoń ź Viflejema ŭ kafiedralny kaścioł śviatoha Franciška Ksavieryja ŭ Hrodnie. Katalickija skaŭty Biełarusi estafietu pieradačy ahniu raspačali 15 śniežnia, kali ahoń prajšoŭ praź biełaruska-polskuju miažu.
U subotu 17 śniežnia ŭviečary śviaty ahoń budzie ŭniesieny ŭ archikafiedralny kaścioł Najśviaciejšaj Panny Maryi ŭ Minsku.
Dastaŭka Viflejemskaha ahniu pa parafijach Biełarusi budzie praciahvacca ažno da śviata Božaha Naradžeńnia 25 śniežnia.
