— My ščaślivyja ad taho, što jaho sustreli i zabrali! Heta było samym hałoŭnym, tamu što zastavaŭsia niejki strach, što niešta moža zdarycca. Zaŭsiody ž jość aściarohi, — dzielicca surazmoŭnica. — Alaksiej adčuvaje siabie dobra, sieŭ za rul. Jany dajechali da najbližejšaj zapraŭki, źjeli niekalki smačnych haračych chot-dohaŭ. A jon vypiŭ vialikuju kavu, jakuju daŭnym-daŭno chacieŭ (śmiajecca). I ŭsio, jedzie ŭ ciaple dadomu razam ź siamjoj.
Sustrakać Alaksieja pryjechali i dźvie małodšyja dački, jakija adrazu pabiehli abdymać tatu.
— Jaho vypuścili raniej, čym pryjechali rodnyja, i jon paru hadzin jašče čakaŭ. Dziaŭčynki padbiehli, abniali. Jašče spytali ŭ mamy: «A tata ciapier budzie žyć z nami?», — kaža siabroŭka. — Apošnija niekalki dzion dla Alaksieja byli ciažkija, tamu my vielmi čakajem jaho doma, kab narešcie sahreć, nakarmić.
Nahadajem, Alaksieja Kudzina abvinavačvali ŭ tym, što padčas akcyi pratestu 10 žniŭnia 2020 hoda jon nanios udary vajskoŭcu ŭnutranych vojskaŭ, a taksama supracoŭniku UUS Minabłvykankama, u jakich paśla byli zafiksavanyja traŭmy.
Dva tydni bajec pravioŭ u Maładziečanskim RAUS i SIZA Žodzina, potym byli chatni aryšt i padpiska ab niavyjeździe, jakuju Alaksiej Kudzin parušyŭ napiaredadni suda, u listapadzie 2020 hoda, i źjechaŭ u Rasiju. Na zapyt biełaruskich uładaŭ jaho zatrymali ŭ Maskvie. 21 lipienia 2021 hoda mužčynu pieradali Minsku.
11 žniŭnia 2021 hoda sud pryznaŭ Alaksieja Kudzina vinavatym pavodle č. 2 art. 363 KK Biełarusi (supraciŭ supracoŭniku orhanaŭ unutranych spraŭ albo inšaj asobie, jakaja achoŭvaje hramadski paradak, spałučany z užyvańniem hvałtu abo z pahrozaj jaho ŭžyvańnia) i pryznačyŭ jamu dva z pałovaj hady kałonii ahulnaha režymu.