2010 hod pavinien stać etapam adnaŭleńnia chutkaha ekanamičnaha rostu. Pra heta zajaviŭ Alaksandr Łukašenka siońnia na naradzie pa vynikach sacyjalna‑ekanamičnaha raźvićcia krainy za 9 miesiacaŭ 2009 hoda i prajektach prahnozu sacyjalna‑ekanamičnaha raźvićcia, biudžetu i asnoŭnych napramkaŭ hrašova‑kredytnaj palityki na 2010 hod.
«Nielha zabyvać, što 2010 hod asablivy: jon zaviaršaje piacihodździe. Ad taho, jak u hety pieryjad spracujem, budzie zaležać dasiahnieńnie namiečanych rezultataŭ i stupień palapšeńnia jakaści žyćcia ludziej — usio, što my abiacali biełaruskamu narodu», — skazaŭ kiraŭnik dziaržavy, adznačyŭšy, što nadaje asablivaje značeńnie siońniašniaj naradzie, pakolki nieabchodna vypracavać važniejšyja instrumienty realizacyi dziaržaŭnaj palityki na 2010 hod.
Kiraŭnik dziaržavy kanstatavaŭ niaprostuju situacyju ŭ biełaruskaj ekanomicy. Pavodle statystyčnych danych, zamarudžvajecca ahulny ekanamičny rost.
Vysokimi zastajucca zvyšnarmatyŭnyja zapasy hatovaj pradukcyi na składach pradpryjemstvaŭ. Skaračajecca ekspart tavaraŭ i pavialičvajecca admoŭnaje źniešniehandlovaje salda. Paharšajecca finansavaje stanovišča pradpryjemstvaŭ i arhanizacyj. Raście prablemnaja zapazyčanaść pa kredytach. Niama stanoŭčych tendencyj i na spažyvieckim rynku krainy. «Faktyčna ni adzin prahnozny pakazčyk pakul nie vykonvajecca, — skazaŭ jon. — Treba pryznać, što tyja instrumienty, jakija my vykarystoŭvali ŭ spryjalny čas, nie dajuć naležnaha efiektu va ŭmovach suśvietnaha kryzisu».
Alaksandr Łukašenka adznačyŭ, što va ŭrada jašče jość čas papravić stanovišča i naviarstać upuščanaje. Ciapier važna skancentravać namahańni i srodki na vyrašeńni hałoŭnych prablem i dabicca pierałomu situacyi, zrabić usio, kab nie sarvać vykanańnie zadańniaŭ piacihodki ŭ cełym.
Pavodle słoŭ kiraŭnika dziaržavy, usiu ŭvahu nieabchodna zasiarodzić na vypracoŭcy aptymalnych šlachoŭ pieraadoleńnia kryzisnych źjaŭ i na pryncypovym abmierkavańni prajektaŭ važniejšych dakumientaŭ na nastupny hod: prahnozu sacyjalna‑ekanamičnaha raźvićcia krainy, biudžetu, asnoŭnych napramkaŭ hrašova‑kredytnaj palityki i źmianieńniaŭ u zakanadaŭstvie ab padatkach. «U ich usio pavinna być pradumanym i vyvieranym z ulikam asablivaściej hetaha niaprostaha pieryjadu, — padkreśliŭ Alaksandr Łukašenka. — Tamu varta admovicca ad biazdumnaha paŭtoru šabłonaŭ i farmalizmu, enierhična ŭkaraniać bolš efiektyŭnyja mietady raboty, jakija pavinny prynosić stanoŭčyja vyniki jak ciapier, tak i ŭ doŭhaterminovaj pierśpiektyvie».
«Pry vyznačeńni rubiažoŭ na 2010 hod pierš za ŭsio nieabchodna pamiatać, jak my budziem davać spravazdaču pierad ludźmi za realizacyju rašeńniaŭ treciaha Usiebiełaruskaha narodnaha schodu, jak vyjści na namiečanyja tempy ekanamičnaha rostu. I samaje hałoŭnaje — jak vykanać praduhledžanyja na piacihodździe važniejšyja paramietry raźvićcia sacyjalnaj śfiery, jakija charaktaryzujuć uzrovień dabrabytu naroda: pracoŭnaja zaniataść, zarpłata, piensii, dapamohi, adrasnaja dapamoha», — udakładniŭ Alaksandr Łukašenka.
