Fota: Wikimedia Commons
U Minsku aktyvizavalisia klaščy: užo bolš za 20 paciarpiełych ad ukusu hetych nasiakomych źviarnulisia da miedykaŭ.
Klaščy pračynajucca ź pieršym ciapłom, jak tolki tempieratura stała vyšejšaj za 5 hradusaŭ. Asabliva aściarožnymi varta być na pryrodzie — u parkach, skvierach, na prysiadzibnych učastkach.
Śpiecyjalisty nahadali: klaščy źjaŭlajucca pieranosčykami niebiaśpiečnych zachvorvańniaŭ — chvaroby Łajma i encefalitu.
«Analiz zachvorvańnia pakazvaje, što ŭ 90% vypadkaŭ zachvorvańnie raźvivajecca tady, kali było praihnaravanaje prafiłaktyčnaje lačeńnie antybijotykami. Pačynać pryjom varta na praciahu 72 hadzin paśla ŭkusu klašča. Čym raniej, tym lepš», — nahadała epidemijołah Minskaha haradskoha centra hihijeny i epidemijałohii Halina Młynarčyk.
Z pačatkam dačnaha siezonu kolkaść paciarpiełych moža pavialičycca. Śpiecyjalisty apracoŭvajuć parki, zony adpačynku, dziciačyja łahiery i navat plažy.
Jakija chvaroby pieradajucca praz ukus klašča?
Samym raspaŭsiudžanym nastupstvam ukusu moža stać zaražeńnie kleščavym encefalitam i barelijozam (jaho jašče nazyvajuć chvarobaj Łajma), nahadvaje vydańnie Tochka.by.
Simptomy kleščavoha encefalitu — mocny hałaŭny bol, spazmy, młosnaść, vanity, boli ŭ rukach i nahach. Lichamanka moža doŭžycca 4-5 dzion, potym stan palapšajecca, ale za hety čas, na praciahu niekalkich tydniaŭ, paškodžvajucca mazhavyja abałonki.
Simptomy stanoviacca bolš ciažkimi, a nastupstvy pieraniesienaha kleščavoha encefalitu mohuć pryvieści da invalidnaści: pakolki paškodžanaja niervovaja sistema, heta pahražaje epilepsijaj, parušeńniem krovazvarotu, pamiaci, myśleńnia, usprymańnia. Z-za paražeńnia mozhu ciarpić i dychalnaja sistema, što moža pryvieści da śmiarotnaha vyniku.
Chvaroba Łajma vyjaŭlajecca sypam na skury, hałaŭnym bolem, vysokaj tempieraturaj, vanitami, a taksama paškodžańniem niervovaj i sardečna-sasudzistaj sistem, aporna-ruchalnaha aparata.
Kali lačeńnie budzie pačataje svoječasova, to nastupstvaŭ pieraniesienaj infiekcyi moža praktyčna nie naziracca. Ale niaredka pry surjoznych nieŭrałahičnych i sustaŭnych prablemach poŭnaha vyzdaraŭleńnia moža i nie zdarycca, mahčymaja invalidnaść.
Čytajcie taksama:
U Biełarusi aktyvizavalisia klaščy
