Fota: ont.by
Razvažajučy pra dziaržaŭnuju simvoliku, Marzaluk faktyčna nie admaŭlaŭ taho, što asablivaj emacyjnaj pryviazanaści da jaje ŭ Biełarusi nie zaŭvažałasia, i vykłaŭ svaju viersiju hetaha fienomiena:
«Nam pieraškadžali raniej iłžyva zrazumietaja palitkarektnaść, niežadańnie čaściakom rabić akcenty na tym, što rabili ŭsie, nasamreč. Niejak heta sychodziła za hrani śviadomaści. Ličyłasia, što samo saboj, i tak usio dobra, i tak zrazumieła. Usio heta razam pryvodziła, u tym liku, i da zališnich abmiežavańniaŭ u vykarystańni toj ža samaj simvoliki».
Ale ciapier usio, maŭlaŭ, pa-inšamu, bo heta «stała brendam, heta stała kruta. U hetym płanie jość pazityŭnaja, kali tak možna skazać, svojeasablivaja «amierykanizacyja», u dobrym sensie».
Pavodle śćviardžeńnia Marzaluka, ciapier u Biełarusi na łukašenkaŭskuju simvoliku stvarajecca moda. Pryčym, samaje važnaje, što hety praces pajšoŭ źnizu ŭ 2020 hodzie.
«Ličyli, što «pipł schavaje», «maŭklivaja bolšaść» — raptam hetyja ludzi vyjšli na vulicy pad svaimi simvałami i papularna ŭsim patłumačyli na aŭtaprabiehach, na mitynhach, jakija prajšli ad Krasnapolla i Kaściukovičaŭ da Bresta i da samych da ŭskrain, što jany svaju krainu, svaje simvały nikomu nie addaduć».
Vykazvańni Marzaluka raźličanyja chiba tolki na ludziej ź vielmi karotkaj pamiaćciu. Nasamreč, arhanizavanyja ŭ padtrymku ŭładaŭ u 2020 hodzie «narodnyja» akcyi kali čym i ŭražvali, to tolki svajoj niešmatludnaściu i jaŭnaj arhanizavanaściu źvierchu. Na ich časta zaśviečvalisia adnyja i tyja ž ludzi, a na arhanizacyju vydatkoŭvalisia niemałyja biudžetnyja srodki. Niekatoryja ž zapłanavanyja i razrekłamavanyja ŭ adkaz na pratesnyja akcyi miehamierapryjemstvy davodziłasia ŭ apošni momant haniebna admianiać, pakolki ŭźnikali prablemy ŭ tym liku i z entuzijazmam mas.
Sapraŭdnaj pryčynaj taho, što pratesty 2020 hoda nie dasiahnuli svajoj mety, byŭ biesprecedentny hvałt z boku siłavych struktur z faktyčnym vyvadam ich z pravavoha pola, a zusim nie pieramohi na ideałahičnych placoŭkach.
Čytajcie taksama:
Łukašysty raspracoŭvajuć adzinuju mietadyčku pa histaryčnaj pamiaci
