Pytańni pastaŭki ŭ Biełaruś rasijskaj elektraenierhii i jaje tranzitu ŭ Kalininhradskuju vobłaść RF i krainy Bałtyi buduć abmiarkoŭvacca 22 studzienia na pieramovach u Minsku.
Jak paviedamiŭ kiraŭnik pres‑słužby rasijskaj kampanii «Inter RAO JEES» Cimur Białoŭ, jaje pradstaŭniki ŭžo vylecieli ŭ Minsk.
Apošni raz tema pastaŭki i tranzitu elektraenierhii abmiarkoŭvałasia ŭ Maskvie 14 studzienia. Žurnalistam było zajaŭlena, što pieramovy prajšli ŭ »farmacie ŭzvažanaha dyjałohu».
Nastupnyja pieramovy płanavalisia ŭ Minsku 19 studzienia, adnak byli pieraniesieny. Baki rastłumačyli heta »vyklučna arhanizacyjnymi momantami».
20 studzienia Cimur Białoŭ paviedamiŭ, što ŭ pieramoŭnym pracesie nazirajecca »zbližeńnie pazicyj». Jon vykazaŭ nadzieju, što «ŭ najbližejšy čas pieramovy zakončacca, i ŭsie pahadnieńni buduć padpisany». Raniej «Inter RAO JEES» zajaŭlała ab namiery pastavić u Biełaruś u 2010 hodzie 3 młrd. kVt•hadz elektraenierhii ŭ adpaviednaści z bałansam Sajuznaj dziaržavy, a taksama da 2,5 młrd. kVt/hadz — «na asnovie pryncypaŭ kamiercyjnaj metazhodnaści». Akramia taho, kampanija płanuje ažyćciaŭlać tranzitnyja pastaŭki ŭ Kalininhradskuju vobłaść i krainy Bałtyi. 4 studzienia kancern »Biełenierha» papiaredziŭ ab mahčymym spynieńni pastavak rasijskaj elektraenierhii ŭ Kalininhradskuju vobłaść z‑za niaŭzhodnienaści ŭmoŭ tranzitu. U adkaz «Inter RAO JEES» zajaviła, što nakiroŭvała ŭ Minsk svaje prapanovy, adnak reakcyi na ich nie było. Pavodle infarmacyi kampanii, pierad novym hodam biełaruski bok zapatrabavaŭ pavialičyć košt tranzitu ŭ niekalki razoŭ, što »nie adpaviadaje duchu padpisanych raniej doŭhaterminovych pahadnieńniaŭ i schiemie ŭzajemadziejańnia «Inter RAO JEES» i «Biełenierha».
Mnohija analityki źviazvajuć prablemy, uźnikłyja ŭ halinie tranzitu elektraenierhii, z naftavym kanfliktam pamiž Biełaruśsiu i Rasijaj, adnak aficyjnyja pradstaŭniki Maskvy i Minska heta abviarhajuć.
