Kaśmietyčnyja źmieny ŭ vybarčym zakanadaŭstvie dazvolili pradstaŭnikam roznych palityčnych sił nazirać za vybarčym pracesam. Zaraz adbyvajeca rehistracyja pradstaŭnikoŭ palityčnych partyj i ruchaŭ u skład vybarčych kamisij.«NN» daviedałasia ab płanach Ruchu «Za Svabodu», AHP i partyi «Spraviadlivy śviet».
«My nie abmiažoŭvajemsia Rucham. Źviarnulisia da viadomych pravaabaroncaŭ i jurystaŭ. Ich kvalifikacyja nie vyklikaje sumniovu. Takim ludziam budzie składaniej admović u rehistracyi»– zaznačajuć pradstaŭniki Ruchu «Za Svabodu». Na siońnia ŭ Minsku padadzienyja dakumienty na rehistracyju 6 asobaŭ, rychtujucca papiery jašče 4 asobaŭ. Jury Hubarevič adznačyŭ, što ŭsiaho pa Biełarusi na pieršym etapie Ruch płanuje ŭklučyć u skład vybarčych kamisij da 50 čałaviek.
Valery Uchnaloŭ z partyi «Spraviadlivy śviet» adznačaje, što płanujecca ŭklučyć u skład vybarčych kamisij roznych uzroŭniaŭ 30 čałaviek. Pryčym Minsk budzie achopleny całkam, tak jak u stalicy partyja raźličvaje na najbolš aktyŭnuju vybarčuju kampaniju. U rehijonach «Spraviadlivy śviet» najbolšuju aktyŭnaść prajavić u Viciebsku i Breście – 6 i 7 pradstaŭnikoŭ adpaviedna.
AHP na siońniašni dzień padała 17 zajaŭ na ŭklučeńnie svaich pradstaŭnikoŭ u terytaryjalnyja vybarčyja kamisii – haradskija i abłasnyja.
«My rabili nacisk na viadomych pradstaŭnikoŭ našaj partyi. Heta nie šarahovyja siabry. S.Alfier, V.Karnijenka – kali im admoviać u rehistracyi na padstavie niedachopu patrebnaha dośviedu. To heta budzie prosta śmiešna.Uvohule, AHP płanuje nazirać u pieršuju čarhu za tymi akruhami, pa jakich buduć iści našyja kandydaty. U pieršuju čarhu my zychodzim z našych patyjnych intaresaŭ» – paviedamili «NN» u AHP.
Nahadajem, što na pačatku śniežnia minułaha hoda Pałata pradstaŭnikoŭ u druhim čytańni pryniała papraŭki ŭ Vybarčy kodeks. Zhodna novaŭviadzieńniami, było zamacavana ŭklučeńnie ŭ skład vybarčych kamisij adnoj treci pradstaŭnikoŭ palityčnych partyj i hramadskich abjadnańniaŭ. Vykankamy pazbavilisia prava ŭklučać svaich pradstaŭnikoŭ u vybarčyja kamisii, a dziaržaŭnyja čynoŭniki zaraz mohuć zajmać nie bolš za adnu treć ich składu.
Subjekty, jakija vyłučyli svaich pradstaŭnikoŭ u vybarčyja kamisii, atrymali prava prysutničać na pasiedžańniach miascovych vykanaŭčych kamitetaŭ i pradstaŭničych orhanaŭ pry vyrašeńni imi pytańniaŭ stvareńnia vybarkamaŭ. Taksama byŭ sproščany paradak vyłučeńnia kandydataŭ, u tym liku ad palityčnych partyj. Zaraz palityčnaja partyja moža vyłučyć kandydata pa luboj vybarčaj akruzie, niezaležna ad isnavańnia na jaje terytoryi partyjnych struktur.
Vybary ŭ miascovyja saviety pakažuć, nakolki ułady hatovyja dapuścić apazicyju da realnaj pracy ŭ składzie vybarčych kamisij roznych uzroŭniaŭ. Isnuje vierahodnaść, što tracinu, adviedzienuju dla hramadstva ŭ vybarčych kamisijach, zojmuć pradstaŭniki praŭładnych arhanizacyj, kštałtu «Biełaja Ruś», BRSM, Biełaruskaja Ahrarnaja partyja, Respublikanskaja partyja, Biełaruskaja patryjatyčnaja partyja i inš.
