Paśla skandalnaha kancerta Mauzera ŭ minskim kłubie «Reaktar» na pytańni «NN» adkazvaje vakalist hurtu Janka Maŭzier.
Janka Maŭzier.
«Naša Niva»: Čamu hurt tak niečakana pakinuli adrazu dva muzyki?
Janka Maŭzier: Sychod basista my pradbačyli. Jon płanavaŭ jašče ŭ žniŭni pierajechać u Picier. Ale ž tady ŭ jaho nie vyjšła. I jon skazaŭ, što zastajecca z nami. Ale my čakali, što jon niekali źjedzie. Nakont bubnača my ničoha nie viedali. Taki tajamničy čałaviek akazaŭsia. Jany razam źjechali ŭ hurt I.O.W.A. Basist u im hraŭ da Mauzera. Zatym hurt znachodziŭsia ŭ niezrazumiełym stanie. I ŭ suviazi ź pierśpiektyvami, što źjavilisia, dziejnaść hurtu adnaviłasia. Tam płaciać bolš.
«NN»: Heta źviazana tolki z žadańniem zarabić hrošaj, ci byli ŭnutranyja kanflikty?
JAM: Supiarečnaści, jak i ŭ luboj kamandzie, zaŭsiody isnavali. A jak pa-inšamu, kali heta čatyry tvorčyja čałavieki? Ale heta narmalna.
«NN»: U Internecie ŭžo źjaviłasia infarmacyja, što i ty možaš pakinuć Mahiloŭ, kab praciahnuć karjeru ŭ Rasii.
JAM: Taki varyjant nie razhladajecca.
«NN»: Padčas vystupu ŭ «Reaktary» ty skazaŭ, što chutka Mauzer pryjedzie ŭ Minsk z elektryčnym kancertam. Ale tolki syšli muzyki. Užo paśpieli znajści zamienu?
JAM: Pytańnie z muzykami vyrašajecca. Jość dobryja varyjanty. My tamu i nie śpiašalisia abviaščać pra sychod basista i bučnača, chacieli spačatku vyrašyć pytańnie z novymi muzykami. Jano amal vyrašyłasia.
«NN»: Janka, nahu nasamreč złamaŭ, ci heta prosta pijar taki?
JAM: Ja nie viedaju, čamu heta ŭspryniali jak pijar. Čamu ciažka zrazumieć, što kali spatrebiłasia b niešta vydumać, kab adtryndziecca, ja prydumaŭ by niešta praściejšaje. Ja na repietycyi padskočyŭ i niaŭdała pryziamliŭsia. Naha zabaleła. Dumaŭ, bol projdzie. Ale jon nie prachodziŭ. I ja pajšoŭ da lekara. Zdymak pakazaŭ pierałom pluśnievaj kostki. Prapanavali hips nakłaści, ale ja admoviŭsia. Doktar skazała, što abłomak kostki znachodzicca pobač z sustavam. I kali jon trapić u sustaŭ, to nieabchodnaja budzie apieracyja. Pahadzilisia na ełastyčny bint.
«NN»: Jakija ŭražańni ad akustyčnaha vystupu?
JAM: Nie viedaju, ci pravilnaje rašeńnie my pryniali, kali nadumali hrać akustyčny kancert. My ž nie akustyčny hurt. Ja — nie hitaryst. I maich łažaŭ było bolš. Ale nam spadabałasia, jak usio prajšło. Raniej my takoha nie rabili. Usio było dušeŭna. Narod padtrymlivaŭ nas.
U Internecie znajšlisia tyja, chto krytyčna acaniŭ kancert. Nazvali navat jaho samym horšym vystupam MAUZERa. Ja ž sam prysutničaŭ na kancercie. I ja bačyŭ, što ludziam spadabałasia. I stanoŭčych vodhukaŭ było bolš.
