Nacyjanalny bank Biełarusi rekamienduje bankam źnižać pracentnyja staŭki na 0,5‑1 pracentny punkt štomiesiac.
Pra heta havorycca ŭ dakładzie staršyni praŭleńnia Nacbanka Piatra Prakapoviča, tekst jakoha raźmieščany ŭ viedamasnym časopisie «Bankovskij viestnik».
Płanujecca, što staŭka refinansavańnia ŭ Biełarusi da kanca 2010 hoda pavinna skłaści 9‑12 pracentaŭ. «Adnak, uličvajučy ciapierašnija makraekanamičnyja ŭmovy i dynamiku inflacyi, na pakazčyk 12 pracentaŭ nieabchodna vychodzić užo ŭ druhim kvartale. Heta źviazana z tym, što zapłanavany ekanamičny rost nie moža mieć miesca pry vysokich pracentnych staŭkach», — ličyć Piotr Prakapovič.
Ciapier pytańni kredytavańnia dziaržaŭnych i bujnych pradpryjemstvaŭ vyrašajucca šlacham patańnieńnia pracentnych stavak za košt biudžetu. Na heta vydzieleny vialikija resursy. Inakš idzie sprava z kredytavańniem nasielnictva, małoha i siaredniaha biźniesu. Hetyja katehoryi pazyčalnikaŭ u poŭnym abjomie adčuli na sabie ŭdar rostu pracentnych stavak. «U nas jość mahčymaść dla taho, kab zabiaśpiečyć ich pastupovaje źnižeńnie i vyjści da kanca druhoha kvartała na ŭzrovień staŭki refinansavańnia 12 pracentaŭ, staŭki pa kredytach — 15 pracentaŭ, staŭki pa depazitach — 11‑13 pracentaŭ hadavych, — padkreśliŭ Piotr Prakapovič. — Pracentnyja staŭki pavinny źnižacca štomiesiac prykładna na 0,5‑1 pracentny punkt». Praŭleńnie Nacbanka budzie kantralavać vykanańnie rekamiendacyj pa hetamu pytańniu.
