«Nie chvalujciesia, ja nie zdymajusia» — tak adkazaŭ svaim jak prychilnikam, tak i niadobrazyčliŭcam sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski
na prośbu prakamientavać paviedamleńni ŚMI, pavodle jakich jon nibyta hatovy źniać svaju kandydaturu na prezidenckich vybarach, što majuć adbycca, u vypadku vyłučeńnia bolš pierśpiektyŭnaha pretendenta ad demakratyčnych sił.
15 sakavika palityk prakamientavaŭ hetu infarmacyju, jakaja źjaviłasia paśla jaho sustrečy z pradstaŭnikami hramadzianskaj inicyjatyvy «Rada biełaruskaj intelihiencyi» 5 sakavika: «U pryncypie, ja navat nie mahu skazać ad svajho imia, što zdymajusia dziela lepšaha kandydata ci budu čakać. Pytańnie ab maim źniaćci abo nie źniaćci budzie prymać Biełaruskaja chryścijanskaja demakratyja. I nijakaha nonsiensu, nijakaj naviny na Radzie biełaruskaj intelihiencyi nie adbyłosia. Jak na pieršym, tak i na druhim ustanoŭčym źjeździe BCHD my kazali, što naša meta — vyłučeńnie adzinaha kandydata ad pravacentrysckich siłaŭ. I ab tym, što chryścijanskija demakraty hatovyja, pa‑pieršaje, brać adkaznaść za krainu, i ja hatovy vyłučacca i iści da kanca, a pa‑druhoje — šukać parazumieńnie ź inšymi palityčnymi siłami. Kali ž usio‑taki adzinym kandydatam budu nie ja, to nam pryjdziecca, zhodna z ahulnymi ŭmovami, sastupić — ale tolki ŭ tym vypadku, kali partyja mianie na heta ŭpaŭnavažyć».
