Dniami narodny paet Biełarusi Ryhor Baradulin prasłuchaŭ solny albom Lavona Volskaha «Biełaja jabłynia hromu». Nazvu prajektu daŭ vierš paeta.
— Heta vielmi cikavy albom! Zdavałasia b, takija vieršy, na katoryja niemahčyma napisać. Naprykład, napisać na Bahuševiča — heta tolki Volski moh! I jakraz jana hučyć, hetaja pieśnia! Naohuł, pieśni ŭsie mieładyčnyja, zapaminajucca. Nu, a što tyčycca «Biełaj jabłyni hromu»… Nie tamu, što jana maja — ja nie z tych, chto tolki svajo lubić… Ale mianie duža ŭraziła pieśnia, Lavonaŭ padychod, mieładyčnaść pieśni. Dziakuj jamu! — tak acaniŭ pracu muzyki Ryhor Baradulin.
Prezientacyja alboma «Biełaja jabłynia hromu» adbudziecca 23 sakavika ŭ Kupałaŭskim teatry.
Ryhor Baradulin
Biełaja jabłynia hromu
Biełaja jabłynia hromu
Čornych cadoŭ lichalećcia.
Jabłyk jaje nikomu
Nie pažadaju na śviecie.
Hołaja jabłynia hromu
Žacham žahnała pryśmierk.
Peŭna, što djabłu samomu
Pomnicca horki prysmak.
Śvietłaja jabłynia hromu
Z sałaŭinaje usianočnaj.
Łaskavaha jabłyka stomu
Ja nadkusiŭ adnojčy.
Cichaja jabłynia hromu,
Pieršaha miłaha hnievu.
Pozirku maładomu
Prahłasia bačyć Jevu.
Dobraja jabłynia hromu,
Radaściu poŭni naŭkolle!
Chaj ža nia budzie złomu
Hollu tvajmu nikoli.
Biełaja jabłynia hromu,
Kłopatam, hamanoju
I na apošniuju stromu
Śvietła ŭzydzi sa mnoju.
1977
