Kiraŭnictva Biełaruskaha respublikanskaha teatra junaha hledača (TIUH) nie pradoŭžyła kantrakt z hałoŭnym režysioram teatra Natallaj Bašavaj. U adkaz kala 20 akcioraŭ teatra źviarnulisia z adkrytym listom da prezidenta Biełarusi, u jakim prosiać Alaksandra Łukašenku nie dapuścić nieabhruntavanaha zvalnieńnia tvorčaha kiraŭnika.
«Bašava prapracavała ŭ teatry 12 hadoŭ, siem ź ich — u jakaści hałoŭnaha režysiora. Za čas pracy jana pastaviła 15 śpiektaklaŭ, dzieviać ź ich stali łaŭreatami i dypłamantami na respublikanskich i mižnarodnych fiestyvalach», — havorycca ŭ zvarocie.
Jak paviedamiŭ BiełaPAN dyrektar TIUHa Juryj Kulik, 30 sakavika ŭ Bašavaj zakončyŭsia termin kantrakta, i joj było paviedamlena ab jaho niepraciahnieńni ŭ adpaviednaści z zakanadaŭstvam. Pavodle jaho słoŭ, na miesca Bašavaj budzie zaprošany inšy śpiecyjalist.
U svaju čarhu Natalla Bašava miarkuje, što novy dyrektar teatra, jaki byŭ pryznačany kala vaśmi miesiacaŭ tamu, pa‑inšamu bačyć pryznačeńnie TIUHa. «Kali maje śpiektakli nacelenyja na maralnaje vychavańnie, to dyrektar choča pamianiać repiertuar na bolš zabaŭlalnyja i kamiercyjnyja prajekty», — skazała jana.
Bašava taksama paviedamiła, što maje namier abskardzić svajo zvalnieńnie ŭ sudzie.
U zvarocie akciory zhadvajuć i ab inšych prablemach teatra. «U 2008 hodzie teatr byŭ pastaŭleny na hetak zvanuju rekanstrukcyju, — pišuć jany. — Z taho času nijakich bačnych dziejańniaŭ pa rekanstrukcyi nie adbyvajecca, i nichto nie moža dać nam jasnaha adkazu ab budučyni teatra». «My taksama nie možam zrazumieć,
čamu druhi hod hrajem śpiektakli pa‑za ścienami rodnaha teatra, choć usie strukturnyja padraździaleńni znachodziacca ŭ budynku i tam ža prachodziać repietycyi», — havorycca ŭ zvarocie.
«Zała Doma litaratara, dzie prachodziać śpiektakli, pa svaich techničnych paramietrach i habarytach nie adpaviadaje jakasnamu ažyćciaŭleńniu pastanovak, davodzicca achviaravać dekaracyjami i abychodzicca minimalnym śviatłom», — zaznačajuć akciory. «A ŭmovy naohuł nie adpaviadajuć sanitarnym normam: usiu zimu my pracavali ŭ chałodnym pamiaškańni, dzie tempieratura apuskałasia da 12—15 hradusaŭ, dzieci ŭ hladackaj zale siadzieli ŭ palito i šubach, a artysty mierźli i chvareli. Niaŭžo naša padrastajučaje pakaleńnie nie zasłuhoŭvaje lepšaha?» — havorycca ŭ zvarocie da prezidenta.
