Pryncypovaja pazicyja biełaruskaha boku zaklučajecca ŭ tym, kab budučaja sustreča Alaksandra Łukašenki i Dźmitryja Miadźviedzieva «nasiła kankretny, pradmietny i źmiastoŭny charaktar».Pra heta było zajaŭlena 6 krasavika padčas sustrečy ŭ Maskvie kiraŭnika Administracyi prezidenta Biełarusi Uładzimira Makieja z rasijskim kaleham Siarhiejem Naryškinym, paviedamlaje pres‑słužba kiraŭnika biełaruskaj dziaržavy.
Rabočaja pajezdka Makieja ŭ Maskvu adbyłasia ŭ raźvićcio damoŭlenaściaŭ, dasiahnutych raniej padčas telefonnaj razmovy pamiž prezidentami Biełarusi i Rasii, jakija damovilisia ab praviadzieńni sustrečy najbližejšym časam.
Pavodle infarmacyi pres‑słužby, Makiej i Naryškin «u adkrytaj i daviernaj formie abmierkavali prablemnyja aśpiekty biełaruska‑rasijskich adnosin, pierśpiektyvy aktyvizacyi dvuchbakovaha supracoŭnictva va ŭsich nakirunkach».
Kiraŭniki administracyj damovilisia ab prapracoŭcy sustrečy prezidentaŭ Biełarusi i Rasii najbližejšym časam, terminy i paradak dnia jakoj buduć uzhodnieny pa dypłamatyčnych kanałach.
Makiej pravioŭ taksama šerah sustreč u pasolstvie Biełarusi z pradstaŭnikami biełaruskaj dyjaspary i abmierkavaŭ pytańni najbolš aktyŭnaha ŭciahvańnia patencyjału biełarusaŭ, jakija žyvuć u Rasijskaj Fiederacyi, u realizacyju kankretnych handlova‑ekanamičnych prajektaŭ u Biełarusi.
Akramia taho, Makiej sustreŭsia ź Dziaržaŭnym sakratarom Sajuznaj dziaržavy Paŭłam Baradzinym. Jany «detalova razhledzieli aktualny paradak dnia intehracyjnych pracesaŭ u ramkach Sajuznaj dziaržavy», paviedamlaje pres‑słužba.