U ahulnaadukacyjnych ustanovach adukacyi Minska ŭ 2010/2011 navučalnym hodzie kłasy pa vyvučeńni zamiežnaj movy padzielać na try hrupy.
Pra heta paviedamiła načalnik upraŭleńnia adukacyi kamiteta pa adukacyi Minharvykankama Zoja Chachłova siońnia na pres‑kanfierencyi ŭ harvykankamie.
«Ministr adukacyi skazaŭ, što na ŭzroŭni ahulnaj siaredniaj adukacyi budzie ŭviedzieny ispyt pa zamiežnaj movie. Z novaha navučalnaha hoda ŭ staličnych škołach kłasy pa zamiežnaj movie buduć padzielenyja ŭžo na try hrupy», — skazała Zoja Chachłova.
Na jaje dumku, novaŭviadzieńnie nie vykliča ciažkaściaŭ u arhanizacyi navučalnaha pracesu. «Nie dumaju, što dla minskich škoł heta budzie składana. Kaniešnie, buduć novyja navučalnyja płany, pavialičycca kolkaść piedahohaŭ», — adznačyła načalnik upraŭleńnia. Pry hetym jana padkreśliła vysoki ŭzrovień padrychtoŭki pa zamiežnych movach staličnych navučencaŭ, jakija zaŭsiody viartajucca z alimpijad z uznaharodami.
Načalnik adździeła daškolnaj i ahulnaj siaredniaj adukacyi kamiteta pa adukacyi Minharvykankama Taćciana Charužaja dadała, što raspracavana novaja kancepcyja vyvučeńnia zamiežnych moŭ. U jaje raspracoŭcy ŭdzielničali śpiecyjalisty Minskaha dziaržaŭnaha linhvistyčnaha univiersiteta, piedahohi‑praktyki. Raspracavany kompleks mierapryjemstvaŭ pa vyvučeńniu zamiežnych moŭ pa novaj kancepcyi. U pieršuju čarhu ŭvaha budzie nadavacca navučańni kamunikatyŭnym navykam, vałodańniu zamiežnaj movaj jak srodkam znosin.
Jak paviedamlałasia raniej sa spasyłkaj na ministra adukacyi Alaksandra Radźkova, vypuskniki siarednich škoł Biełarusi buduć zdavać zamiežnuju movu ŭ abaviazkovym paradku praz 2,5 hoda. Pryčym viedamstva ličyć metazhodnym uvieści ispyt za siaredniuju ahulnaadukacyjnuju škołu ŭ vyhladzie vusnaha ispytu, a voś užo ŭstupny ŭ VNU budzie prachodzić u testavaj formie.
