Aktyvist KCHP BNF Siariej Kavalenka, jakoha 20 krasavika buduć sudzić za vyviešvańnie bieł‑čyrvona‑biełaha ściaha na haradzkoj jołcy, źviarnuŭsia da vidavočcaŭ padziej 7 studzienia.
Jon źviarnuŭsia da žycharoŭ doma №8 pa Maskoŭskim praspekcie, nasuprać jakoha była ŭstalavana jołka, kab jany pryjšli zaŭtra ŭ 10.30 u Kastryčnicki rajonny sud, dzie maje raspačacca praces.
Spadar Kavalenka maje namier z dapamohaj šarahovych žycharoŭ Viciebsku abvierhnuć abvinavačańni ŭ złosnym chulihanstvie i supracivie milicyjantam.
Apazycyjaner nastojvaje, što nia mieŭ na mecie ździejśnić chulihanski ŭčynak — što nie źbiraŭsia nanieści škody ni ŭpryhožańniam na jołcy, ni svaim ziemlakam, jakija sabralisia ŭ toj dzień na kaladny kancert mastackaj samadziejnaści. Siarhiej Kavalenka ćvierdzić, što pravodziŭ palityčnuju akcyju, kali vyviešvaŭ ściah, i što heta nielha rasceńvać jak złosnaje chulihanstva.
Kavalenka taksama źbirajecca asprečvać śviedčańni milicyjantaŭ — padpałkoŭnika Andreja Ivanova, małodšaha siaržanta Maksima Maksimava i staršaha siaržanta Vasila Palityki — pra toje, što jon akazvaŭ im supraciŭ padčas zatrymańnia. Siarhiej Kavalenka spadziajecca, što mohuć znajścisia achvotnyja zaśviedčyć, što jon nie abražaŭ supracoŭnikaŭ milicyi, zatoje jany hvałtam ciahnuli jaho ŭ mašynu, źbivajučy pa darozie.
Nahadajem, što Siarhiej Kavalenka dvojčy źviartaŭsia ŭ Kastryčnicki rajsud, kab raspačać spravu suprać milicyjantaŭ, jakija nanieśli jamu cialesnyja paškodžańni. I dvojčy sud u hetym admoviŭ.
Pazoŭ milicyjantaŭ, jakija patrabujuć ad apazycyjanera materyjalnaj kampensacyi maralnaj škody ŭ pamiery 10 miljonaŭ kožnamu, taksama budzie razhladacca zaŭtra.
Pavodle abvinavačańnia ŭ chulihanstvie i supracivie rabotnikam milicyi Siarhieju Kavalenku pahražaje da 6 hod abmiežavańnia voli.