Mikałaj Aŭtuchovič asudžany na piać hadoŭ i dva miesiacy kałonii ŭzmocnienaha režymu za niezakonnaje zachoŭvańnie i pieravozku piaci patronaŭ i palaŭničaj vintoŭki. Abvinavačvańni ŭ padrychtoŭcy terarystyčnych aktaŭ suprać namieśnika ministra pa padatkach i zborach Vasila Kamianko i staršyni Hrodzienskaha abłvykankamu Uładzimira Saŭčanki źniatyja.
U zalu suda nie zdoleli patrapić dziesiatki ludziej - palityki, pravaabaroncy, hramadskija aktyvisty.
Nie dakazana taksama datyčnaść Aŭtuchoviča da padpałaŭ majomaści načalnika Vaŭkavyskaha RUUS Kacuby i padatkavaha inśpiektara Mandzika.
Što datyčyć vintoŭki, to jana raniej naležała Aŭtuchoviču. Ale jon straciŭ prava na jaje vałodańnie paśla pieršaha terminu. I hetaja vintoŭka była aformlenaja na inšaha čałavieka.
Pra patrony, što byli znojdzienyja padčas vobysku ŭ siejfie, Aŭtuchovič kaža, što ŭžo paśpieŭ zabycca. Takim čynam, za kožny z patronaŭ Mikałaj atrymaŭ pa hodu turmy.
Uładzimir Asipienka asudžany na try hady kałonii ahulnaha režymu za zachoŭvańnie i pieravozcy zbroi i vybuchoŭki. Za toje ž asudžany na try hady i Alaksandr Łaryn.
Absalutnuju bolšaść pakazańniaŭ, što Łaryn davaŭ na sudzie, sud paličyŭ niepraŭdzivymi. A časam inšych dokazaŭ viny prosta nie isnavała.
Milicyjanier Michaił Kazłoŭ asudžany na dva hady kałonii biez paražeńnia ŭ pravach. Kazłoŭ pastavili ŭ vinu toje, što jon mieŭ peŭnuju infarmacyju pa zbroi, ale z asabistych intaresaŭ nie vydaŭ jaje śledstvu.
Advakat Pavieł Sapiełka aceńvaje prysud jak «biaśsille ŭładaŭ pierad jahonym padabaronym — sumlennym i česnym čałaviekam». «Adzinym zakonnym prysudam było b apraŭdańnie», — kaža P.Sapiełka.
Pravaabaronca Aleh Voŭčak miarkuje, što Asipienka i Kazłoŭ mohuć apynucca na voli pa ŭmoŭna‑daterminovamu vyzvaleńniu ŭžo praz try‑čatyry miesiacy. A Aŭtuchovič — praz dva hady.
Pasoł Šviecyi Stefan Eryksan kaža, što dla jaho važnym źjaŭlajecca, što «źniatyja najbolš ciažkija złačynstvy. Tym nie mienš, piać hadoŭ, mnie zdajecca, — heta vielmi šmat».
Paśla prysudu ludzi ŭskładali kvietki da hanku Viarchoŭnaha suda. Hukali «Žyvie Biełaruś», śpiavali «Mahutny Boža». Ahułam sabrałasia bolš za sotniu čałaviek. Siarod ich byli Andrej Sańnikaŭ, Vital Rymašeŭski, Ina Kulej, Źmicier Daškievič, Artur Fińkievič, Viačasłaŭ Siŭčyk.
* * *
Aŭtuchoviča, Asipienku i Łaryna abvinavačvali ŭ padrychtoŭcy terarystyčnaha akta ŭ dačynieńni da namieśnika ministra pa padatkach i zborach Vasila Kamienki i byłoha staršyni Hrodzienskaha abłvykankama Uładzimira Saŭčanki. Aŭtuchoviča i Asipienku taksama abvinavačvajuć u arhanizacyi padpału doma eks-načalnika Vaŭkavyskaha RAUS Siarhieja Kacuby ŭ 2004 hodzie. Kazłoŭ, były kiraŭnik upraŭleńnia pa baraćbie z arhanizavanaj złačynnaściu pa Hrodzienskaj vobłaści, abvinavačvajecca ŭ tym, što viedaŭ pra płany padrychtoŭki terakta, ale nie sprabavaŭ jaho praduchilić.
16 krasavika prakuror Eldar Safaraŭ zapatrabavaŭ pryhavaryć Aŭtuchoviča da 20 hadoŭ kałonii ŭzmocnienaha režymu z kanfiskacyjaj majomaści,
Asipienku i Łaryna — da 11 hadoŭ kałonii ŭzmocnienaha režymu. Dla Kazłova jon zapytaŭ try hady kałonii ahulnaha režymu biez prava zajmać kirujučyja pasady.
Mikałaj Aŭtuchovič i Uładzimir Asipienka byli aryštavanyja 8 lutaha 2009 hoda.
Hladzi taksama Zatrymanyja Kazulin, Dziemidzienka, Makajeŭ (fota)
