U 2009 hodzie amal 35% biełaruskich siemjaŭ z tryma dziećmi adnosilisia da małazabiaśpiečanych (z uzroŭniem siaredniedušavych najaŭnych resursaŭ nižej za biudžet pražytačnaha minimumu). Pra heta paviedamiła kansultant hałoŭnaha ŭpraŭleńnia palityki zaniataści i narodanasielnictva Ministerstva pracy i sacyjalnaj abarony Śviatłana Biełaš 26 maja na pres‑kanfierencyi ŭ Minsku.
Pavodle jaje słoŭ, letaś da małazabiaśpiečanych adnosilisia 9% siemjaŭ z dvuma dziećmi i 4,6% siemjaŭ z adnym dziciem. Uzrovień małazabiaśpiečanaści ŭ siarednim pa Biełarusi skłaŭ 3,7%.
«U vyniku praviedzienych mier pa sacyjalna‑ekanamičnaj padtrymcy siemjaŭ ź dziećmi možna havaryć ab tym, što za apošnija hady małazabiaśpiečanaść siemjaŭ ź dziećmi źnižajecca. Adnak u paraŭnańni ź inšymi sacyjalna‑demahrafičnymi hrupami jana zastajecca vysokaj», — skazała Biełaš.
U 2009 hodzie, adznačyła jana, dola piensij, dapamoh, stypiendyj, ilhot i datacyj skłała amal 10% usich dachodaŭ u siemjach z adnym dziciem, kala 11% — u siemjach z dvuma dziećmi, bolš za 20% — u siemjach, dzie vychoŭvajucca troje i bolš dziaciej.
Na 1 studzienia 2010 hoda sistemaj dapamoh było achoplena kala 450 tys. dziaciej — 25% ad ich ahulnaj kolkaści. Letaś siaredniamiesiačnyja pamiery dapamoh na dziaciej da i bolš za 3 hady pavialičyłasia ŭ siarednim na 14,5%.
Dziaržaŭnaja adrasnaja dapamoha ŭ 2009 hodzie była vydzielena bolš čym 52 tys. siemjaŭ ź dziećmi. Heta 84% ad ahulnaj kolkaści atrymalnikaŭ adrasnaj dapamohi.
Pavodle słoŭ pradstaŭnika Minpracy, sa srodkaŭ dziaržbiudžetu taksama było vydzielena 17 młrd. 157 młn. rubloŭ na dapamohu mnahadzietnym i maładym siemjam dla pahašeńnia zapazyčanaści pa kredytach na budaŭnictva, rekanstrukcyju abo nabyćcio žylla. U 2008 hodzie hetaja suma skłała 10 młrd. 627 młn. rubloŭ.
Jak paviedamiła Biełaš, značnuju ŭvahu orhany pa pracy, zaniataści i sacyjalnaj abaronie nadajuć zaniataści studentaŭ i navučencaŭ u volny ad vučoby čas i padčas letnich kanikuł. U 2009 hodzie ŭ pieryjad kanikuł było pracaŭładkavana bolš za 40 tys. navučencaŭ i studentaŭ, ź jakich 84% — navučency 8—11‑ch kłasaŭ.
