Pra heta zajaviŭ u intervju BiełaPAN sakratar CVK Mikałaj Łazavik.
«Palityčnyja partyi dla taho i stvarajucca, kab vieści pracu pa prasoŭvańni svaich idej i pa zavajavańni realnaj ułady, — skazaŭ jon. — A realnuju ŭładu možna zavajavać dvuma šlachami: revalucyjnym, što ŭžo prachodzili ŭ historyi i što nikim nie ŭchvalajecca, i demakratyčnym, šlacham udziełu ŭ vybarach».
Na dumku Łazavika,
«kali palityčnaja partyja sapraŭdy choča zajavić pra sabie jak pra surjoznaha subjekta palityčnaha pracesu, jana pavinna adrazu ž paśla vybarčaj kampanii, što prajšła, rychtavacca na nastupnaj».
«Kali ŭ partyi jość dastojny kandydat, lider, jaki hatovy adlustroŭvać intaresy nie tolki svajoj partyi, ale i vybarščykaŭ, — heta tolki stanoŭčaja charaktarystyka partyi. Čym raniej partyja pačnie svaju pieradvybarnuju kampaniju, tym bolš realny jaje stanoŭčy vynik», — padkreśliŭ jon.
Łazavik nie ličyć, što subjekty palityčnaha žyćcia paśpiašalisia, zajaŭlajučy pra svaje prezidenckija ambicyi.
«Naadvarot, hetuju pracu treba było pačynać jašče raniej», — skazaŭ jon.
U jakaści prykładu sakratar CVK pryvioŭ Libieralna‑demakratyčnuju partyju. »Hetaja partyja ŭžo daŭno vyznačyłasia sa svaim kandydatam, jaki ščyra zajaŭlaje, što viadzie pieradvybarnuju prezidenckuju kampaniju. Bolš za toje, i miascovyja vybary byli vykarystany partyjaj, kab prainfarmavać vybarščykaŭ ab svaim kandydacie. Mnohija bačyli, što pradstaŭniki ŁDP raspaŭsiudžvali materyjały ab kandydatach u deputaty miascovych savietaŭ, na jakich adnačasova havaryłasia, što ich lider Siarhiej Hajdukievič źjaŭlajecca patencyjnym kandydatam u prezidenty», — skazaŭ jon.
«Toje, što źjaviłasia šmat patencyjnych kandydataŭ, moža nas tolki radavać, — zajaviŭ Łazavik. — Množnaść punktaŭ hledžańnia, jakaja isnuje ŭ hramadstvie, pavinna adlustroŭvacca niejkim čynam i padčas vybarčaj kampanii».
Jak miarkuje sakratar Centrvybarkama, vialikaja kolkaść kandydataŭ budzie sadziejničać tamu, što vybarščyki «zmohuć vyznačycca, chto ź ich najbolš blizka staić da ich pa ideałahičnych pohladach, nakolki ich prahramy adpaviadajuć ich pažadańniam».





