Płanavanaje na pačatak červienia pasiadžeńnie polska‑biełaruskaj kamisii, jakaja vyśviatlaje pryčyny kanflikta vakoł niepryznanaha aficyjnym Minskam Sajuza palakaŭ u Biełarusi adterminavanaje na niavyznačany čas.
Pracy kamisii nie spynieny adnak u suviazi sa składanaściami, a chutčej za ŭsio takoje pasiadžeńnie ŭ červieni ŭžo nie adbudziecca — skazaŭ sakratar polskaj ambasady ŭ Minsku Pavieł Marčuk:
— Viadoma, što pasiadžeńnie adbudziecca, ale ŭvieś čas, z uvahi na situacyjaju ŭ Polščy, kadravyja źmieny ŭ MZS — my čakajem sihnał. Adbyłasia źmiena na pasadzie staršyni kamisii z polskaha boku — u avijakatastrofie pad Smalenskam zahinuŭ ministr Andžej Kremier. Niadaŭna zamianiŭ jaho ambasadar Polščy ŭ Biełarusi Hienryk Litvin. Sprava znachodzicca pad pilnym nahladam, ale kali kankretna kamisija źbiarecca, nie ŭmieju pakul adkazać. Napeŭna, niekatory čas usio heta budzie ciahnucca.
Naprykancy minułaha tydnia ź vizitam ŭ Hrodnie pabyvaŭ namieśnik ministra zamiežnych spravaŭ, jaki taksama pryznačany staršyniom kamisii z polskaha boku, Hienryk Litvin.
Pavieł Marčuk nie vyklučaje, što vizit ministra ŭ Hrodna byŭ niepasredna źviazany z padrychtoŭkaju da pracy ŭ polska‑biełaruskaj kamisii. «Niemahčyma, kab polski dypłamat byŭ u Hrodnie i nie sustrakaŭsia z pradstaŭnikami Sajuza palakaŭ», adznačyŭ Pavieł Marčuk.
