Ab hetym paviedamiŭ dyrektar Vilejskaha krajaznaŭčaha muzieja Siarhiej Hančar.
«Paśla taho, jak muziej daŭ adkaz na list dyrektara lesahaspadarčaj ustanovy «Krasnasielskaje», pretenzij ad jaho bolš nie było».
Pa słovach sp. Hančara, kamień Piłsudskaha ŭniesieny ŭ śpis pomnikaŭ rajonnaha značeńnia. A pieraviezieny ŭ Vilejku jon byŭ dla stvareńnia impravizavanaha muzieja vałunoŭ kala vystavačnaj zały. Ale pakul nie praviedzieny kapitalny ramont zały, vałuny znachodziacca ŭ roznych miescach. Kamień Piłsudskaha časova budzie znachodzicca na terytoryi Rajonnych elektryčnych sietak, dzie staić ad 2004 hoda.
«Mnie ŭ pryncypie čaho dabivacca? Tam jość hramadskaść — chaj vyrašaje. Jość rajvykankam — chaj prymaje rašeńnie.
Ja ŭnios prapanovu tolki. Bo liču, što pomnik pavinien stajać tam, dzie jaho pastavili», — prakamientavaŭ rašeńnie pakinuć kamień u Vilejcy dyrektar lesahaspadarčaj ustanovy «Krasnasielskaje» Alaksandr Bury.
Vałun Piłsudskaha ŭ vioscy Budźki Vilejskaha rajona pastavili ŭ 1930-ch hadach paśla śmierci maršała pobač sa škołaj jaho imia. U 2004 polskija dypłamaty zachacieli pieravieźci kamień na terytoryju pasolstva ŭ Minsku. Vilejskija ŭłady dazvolili taki krok. Ale, kali palaki pryjechali pa kamień, jaho na miescy nie znajšli. Jak vyśvietliłasia, vilejskija krajaznaŭcy Anatol Rohač i Jaŭhien Pietrykievič pieravieźli vałun u horad. Byŭ raspačaty zbor podpisaŭ za toje, kab pakinuć kamień u Vilejcy. Pad ciskam hramadskaści staršynia rajvykankama pryniaŭ adpaviednaje rašeńnie.
