Danone pieradumaŭ budavać zavod u Biełarusi

Francuzskaja hrupa Danone pakul admoviłasia ad idei budaŭnictva ŭ Biełarusi zavoda pa pierapracoŭcy małaka. Pra heta zajaviŭ hałoŭny kiraŭnik padraździaleńnia «Małočnyja pradukty» Danone va Uschodniaj Jeŭropie i Siaredniaj Azii Filip Kiehiels.

Upieršyniu ideja budaŭnictva francuzskaj kampanijaj zavoda ŭ Biełarusi aktyŭna abmiarkoŭvałasia na Biełaruskim inviestycyjna-ekanamičnym forumie, jaki prajšoŭ u listapadzie minułaha hodu. Havorka išła ab stvareńni biełaruska-francuzskaha pradpryjemstva pa hłybokaj pierapracoŭcy małaka ŭ Kiraŭskim rajonie Mahiloŭskaj vobłaści. Košt prajektu aceńvaŭsia ŭ 20 młn jeŭra. Pavodle papiarednich padlikaŭ, uvod u ekspłuatacyju novaha pradpryjemstva dazvoliŭ by adkryć 140 pracoŭnych miescaŭ. «U Biełarusi jość jakasnaja syravina, dyscyplinavanyja supracoŭniki. Kali rašeńnie budzie pryniataje, prajekt budzie realizavany za 18 miesiacaŭ», — skazaŭ tady F. Kiehiels.

Adnak na Pieciarburhskim mižnarodnym ekanamičnym forumie Filip Kiehiels zajaviŭ, što «kampanija ciapier pierahladaje svaje płany».

Heta źviazana z tym, što niadaŭna Danone i rasijskaja kampanija «Junimiłk» abviaścili ab źlićci małočnaha biznesu ŭ Rasii i SND. «U „Junimiłka“ ŭ Biełarusi jość dźvie vytvorčyja placoŭki, i my budziem dumać, jak ich efiektyŭna vykarystoŭvać. Bolš łahična abapiracca na isnyja mahutnaści, čym budavać niešta novaje», — zajaviŭ F. Kiehiels. Razam z tym, jon paćvierdziŭ namiery pa pašyreńni viadzieńnia biznesu ŭ Biełarusi. U Biełarusi kampanija Danone pradstaŭlenaja takimi brendami, jak Actimel, Activia, «Raściška», Danissimo, i «Danon», jakija vyrablajucca na dvuch zavodach u Rasii — u Čechavie i Taljaci.

U minułuju piatnicu prezident Łukašenka naviedaŭ adnu ź dźviuch vytvorčych placovak «Junimiłka» ŭ Škłovie (jašče adno SP funkcyjanuje ŭ Pružanach). Pa słovach kiraŭnika dziaržavy, zamiežnyja inviestary pavinnyja zabiaśpiečvać maksimalnuju hłybiniu pierapracoŭki biełaruskaha małaka. Jon adznačyŭ, što kampanija «Junimiłk Škłoŭ» źjaŭlajecca svajho rodu ekśpierymientalnym prajektam. «Masava my nie pojdziem pa šlachu pryciahnieńnia zamiežnych inviestaraŭ u pierapracoŭku pa zrazumiełych pryčynach: u nas i svaich pradpryjemstvaŭ chapaje», — zajaviŭ Łukašenka.

Pa najaŭnaj infarmacyi, abjadnanaja kampanija «Danone Junimiłk» u Biełarusi płanuje aryjentavacca na vypusk vysokamaržynalnych praduktaŭ (johurtaŭ, tvarožnych desiertaŭ i h.d.). Asnoŭnaja dola pradukcyi pojdzie na ekspart u Rasiju. Tak, u adpaviednaści z kancepcyjaj raźvićcia Škłoŭskaha zavoda, ekspartnaja mahutnaść pradpryjemstva da kastryčnika 2011 pavinnaja vyraści ŭ 3 razy da 450–500 t za sutki, abo 160–170 tys. t za hod z ekspartnaj vyručkaj 70–80 młn dalaraŭ. «Junimiłk» taksama aktyŭna supracoŭničaje ź biełaruskimi vytvorcami i zakuplaje značnyja abjomy suchoha małaka, masła, zhuščanaha małaka. Akramia taho, kampanija sumiesna z Rahačoŭskim i Hłybockim małočna-kansiervavymi kambinatami vyrablaje zhuščanaje małako dla rynkaŭ Rasii, Ukrainy i Kazachstana.

TUT.BY

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH