Čaćviorty dzień u lasach homielskaha Paleśsia viaducca pošuki12-hadovaha Uładzimira ź vioski Kapcevičy Pietrykaŭskaha rajona.
Jak paviedamili ŭ Pietrykaŭskim RAUS, lasny masiŭ pračesvajuć bolš jak 40 čałaviek ź liku supracoŭnikaŭ milicyi, MNS, lashasa. Da ich padklučylisia ŭnutranyja vojski, miascovyja palaŭničyja, nastaŭniki viaskovych škoł. Z 19 lipienia miascovaść abśleduje viertalot mazyrskaha atrada «Biellesavija». Aryjencirovačnaja zona, dzie mahło zhubicca dzicia, ahledžana ŭžo niekalki razoŭ, viadziecca taksama pošuk u napramku susiedniaha Žytkavickaha rajona.
«Chłopčyk razam z maci i małodšaj siastroj ranicaj 18 lipienia pajšoŭ u les pa čarnicy. Pakul žančyna źbirała jahady ŭ čaščobie, dzicia, pakinutaje kala lasnoj darohi, prapała. Paśla dźviuch hadzin samastojnych biespaśpiachovych pošukaŭ maci źviarnułasia ŭ milicyju.
Les, dzie zhubiŭsia chłopčyk, nievialiki, jaho akružajuć vioski na adlehłaści 6–8 kiłamietraŭ. Šancy znajści dzicia žyvym pakul jość, pošuki buduć praciahvacca datul, pakul chłopčyka nie znojduć», — zajavili ŭ RAUS.
U lasnym masivie kruhłasutačna dziažurać milicejskija pasty.
Pošuk dziciaci abciažarvaje toje, što ad naradžeńnia jon pakutuje na sindrom Dauna, tamu nie zaŭsiody pavodzić siabie adekvatna — moža nie adklikacca na kryk i chavacca pry šumie.
U pravaachoŭnych orhanach paviedamili, što ŭ letni i vosieński čas na Paleśsi miascovyja žychary časta hublajucca ŭ lasach, pryčym nie tolki dzieci, ale i darosłyja, asabliva piensijaniery. «Hora, kali heta zdarajecca vosieńniu, padčas zboru hryboŭ: nočy chałodnyja, a ludzi, asabliva pažyłyja, nie zaŭsiody mohuć pieranieści nizkuju tempieraturu», — skazaŭ supracoŭnik RAUS.
