Lidera hramadzianskaj kampanii «Jeŭrapiejskaja Biełaruś», kandydata ŭ prezidenty Biełarusi vyklikaŭ na dopyt śledčy Azarevič.
«Mianie vyklikajuć na dopyt, choć užo ahučanaja aficyjnaja viersija śmierci Aleha. Patrabujuć pradstavić znojdzienuju la dačy Aleha mašynu na ahlad, a mianie majuć namier dapytać, choć apytvali jašče na miescy zdareńnia. Mašynu adhaniali ad dačy my z bratam Aleha, paśla taho, jak niekalki razoŭ spytali supracoŭnikaŭ milicyi, pakidać jaje ci zabirać. Mašyna była ahledžanaja, nijakich pradmietaŭ kanfiskavana nie było. Nam skazali, što «lepš zabrać».
Paśla naviedvańnia śledčaha Andrej Sańnikaŭ paviedamiŭ nastupnaje: «Heta byŭło „apytańnie“, jak jany skazali. Nibyta apytvajuć ludziej pavodle śpisu vyklikaŭ z mabilnaha telefona. Kali ja spytaŭ, čamu mianie vyklikali, kali ŭžo apytvali na miescy zdareńnia, skazali što „nieabchodna jašče šmat čaho ŭdakładnić“. Spačatku byli ahulnyja pytańni: što za čałaviek, jak charaktaryzujecca, ci nie zaŭvažaŭ čaho dziŭnaha, abstaviny jaho pavodzinaŭ. Potym byli pytańni ab sajcie charter97.org, ci maju ja da jaho adnosiny. Ja skazaŭ, što źbirajusia iści kandydatam u prezidenty, što raźličvaŭ na Aleha, jaki daŭ zhodu dapamahać mnie. Heta zafiksavali ŭ pratakole. Pytalisia, pahražali ci Alehu. Ja raspavioŭ, što stanovišča ŭ krainie abvastrajecca, ludziej chapajuć na vulicach, razhaniajuć demanstracyi, uzmacniajecca cisk na žurnalistaŭ. Uvohule, pry situacyi ŭ Biełarusi nie davodzicca kazać pra biaśpieku praciŭnikaŭ dyktatury.
Hutarku vioŭ starejšy śledčy pa najvažniejšych spravach Alaksandr Azarevič. U mianie źjaviłasia jašče bolš sumnievaŭ, što heta było samahubstva. Mnie patłumačyli, što navat pra datu śmierci Aleha možna budzie kazać tolki paśla praviadzieńnia poŭnaj ekśpiertyzy, što moža zaniać kala miesiaca. Tamu ŭ mianie tolki ŭzmacniŭsia niedavier da aficyjnych zajavaŭ MUS, jakoje ŭžo vynosić svajo zaklučeńnie ab pryčynach śmierci Aleha. Tamu što, kali jany nie mohuć z upeŭnienaściu ŭstalavać čas śmierci, jak jany mohuć kazać, čamu čałaviek pamior?».
Nahadajem, što cieła zasnavalnika i kiraŭnika sajta charter97.org Aleha Biabienina było znojdziena paviešanym 3 vieraśnia na jaho dačy pad Minskam. Pravaachoŭnyja orhany paśpiašalisia paviedamić, što heta było samahubstva. Adnak kalehi žurnalista paviedamlajuć, što śmierć Aleha Biabienina vyklikaje šmat pytańniaŭ. Sudmiedekśpierty błytajucca navat u dacie nastupleńnia śmierci žurnalista. Aleh Biabienin nie pakinuŭ paśla siabie nijakaj zapiski. Jon byŭ poŭny płanaŭ. U žurnalista zastalisia žonka i dvoje synoŭ. Jon byŭ asnoŭnym členam kamandy apazycyjnaha kandydata ŭ prezidenty Andreja Sańnikava.
