A.Dźmitryjeŭ pieršyja hadziny paśla vyzvaleńnia.
Siońnia ź śledčaha izalatara KDB pad padpisku ab niavyjeździe byŭ vyzvaleny kiraŭnik pieradvybarčaha štabu Ŭładzimiera Niaklajeva Andrej Dźmitryjeŭ.
Drakachrust: Andrej, na jakich umovach vas vyzvalili?
Dźmitryjeŭ: Umovy tyja samyja. Ja źjaŭlajusia abvinavačanym pa kryminalnaj spravie ab udziele i arhanizacyi masavych biesparadkaŭ. Prosta mnie zamienienaja miera strymańnia, i ciapier ja znachodžusia nie za kratami, ale nie mahu vyjechać ź Biełarusi.
Drakachrust: A ci pisali vy niejkija listy, davali niejkija tłumačeńni?
Dźmitryjeŭ: Nie, nijakich zvarotaŭ i tłumačeńniaŭ ja nie pisaŭ. Ja nia viedaju, čamu mianie vyzvalili. Paklikali, dali padpisać abaviazańnie, što ja abiacaju nie vyjaždžać ź Biełarusi i vykonvać usie
Drakachrust: A jak vy možacie patłumačyć vaš vystup, jaki pakazvała biełaruskaje telebačańnie? Jakaja jaho pryčyna, jakaja pryroda?
Dźmitryjeŭ: Ja daŭ taksama padpisku, što nie mahu razhałošvać abstaviny kryminalnaj spravy. Vašaje pytańnie tyčycca jakraz hetych abstavinaŭ, tamu ja nie mahu pakul heta kamentavać. Moža praz peŭny čas ja heta adkamentuju.
Drakachrust: Na vaš pohlad, čamu vy na voli, a spadar Niaklajeŭ — u turmie?
Dźmiryjeŭ: Ja nia viedaju. Napeŭna možna znajści ŭ hetym lohiku. Ja viedaju, što siońnia taksama byŭ vyzvaleny Rymašeŭski. Mahčyma, heta sproba źnizić nakał, jaki zaraz byŭ. Nia vyklučana, što jašče niekaha vypuściać praz peŭny čas.
Ale lahičnych tłumačeńniaŭ u mianie niama. Mahčyma, tamu, što ja nie kandydat.Ja rychtavaŭsia da taho, što praviadu tam jašče miesiacy čatyry, pakul budzie ciahnucca hetaje raśśledavańnie, a potym niejki termin budzie. Tak što dla mianie samoha heta dziŭna.
Drakachrust: Padčas znachodžańnia za kratami vy sustrakalisia ź inšymi fihurantami pa spravie?
Dźmitryjeŭ: Nie, tam usio tak arhanizavana, što sustrecca niemahčyma, navat vypadkova.
Drakachrust: Andrej, mahčyma vy viedajecie pra zajavy paśla vybaraŭ vašaha adnapartyjca Jarasłava Ramančuka, Ryhora Kastusiova pra padziei 19 śniežnia? Jak vy ich aceńvajecie?
Dźmitryjeŭ: Ja bačyŭ pa BT hetyja zajavy. Nu jak heta acanić? Kožny sam vybiraje tyja kroki, jakija jon robić. Ale zajava spadara Ramančuka mianie vielmi ździviła. Usio ž taki tam z proźviščami… Heta asabisty vybar, ludzi na niešta raźličvali, chacieli niečaha damahčysia. Kali heta kamuści dapamahło, to dobra. Ale mnie zdajecca, što nie.
Drakachrust: A ci možna skazać, kali heta nie tajamnica śledztva, jaki ŭsio ž byŭ plan kamandy Niaklajeva na viečar 19 śniežnia?
Dźmitryjeŭ: My dumali tolki pra mirnuju akcyju.
Nijakich idejaŭ šturmu nie było, bo heta źniščała ŭsiu idealohiju pratestu.Nakont taho, što rabić, byli roznyja varyjanty ŭ zaležnaści ad kolkaści ludziej i ad inšych čyńnikaŭ — byli varyjanty, kab zastacca ci zrabić niejkaje šeście. Ja pakul nia dumaju, što pravilna niešta raspaviadać, bo nie razumieju, što moža paškodzić i mnie asabista, i tym, chto tam zastaŭsia.
Drakachrust: Što budzie z kampanijaj «Havary praŭdu»? Jak vy budziecie dziejničać?
Dźmitryjeŭ: Zaraz treba zrazumieć, što zastałosia, chto zastaŭsia. Ja viedaju, što niekatoryja ludzi źjechali. Ja maju namier praciahvać, jak my kazali, kampaniju «Havary praŭdu» nie źnikaje paśla vybaraŭ, jana budzie isnavać, moža być niejak transfarmavacca ŭ palityčnuju siłu. Ciapier jana pavinna skancentravacca tolki na tym, kab dapamahać tym, chto zastaŭsia tam. Heta toje, što ja pačnu rabić z zaŭtrašniaha dnia. Mnie dali šaniec być tut, nia viedaju čamu, ja vykarystaju jaho, kab dapamahčy tym, chto zastaŭsia tam.
