Situacyja ŭ Biełarusi stała adnoj z tem sustrečystats-sakratara — namieśnika ministra zamiežnych spraŭ Rasii Ryhora Karasina z pasłom FRH u Maskvie Ulrycham Brandenburham 18 studzienia.
Jak paviedamiŭ departamient infarmacyi i druku MZS RF, padčas razmovy «adbyŭsia abmien dumkami pa asobnych pytańniach adnosinaŭ Rasii i Hiermanii z krainami SND». «Asablivaja ŭvaha nadadziena raźvićciu palityčnaha pracesu ŭ Małdovie i pierśpiektyvam prasoŭvańnia ŭ prydniastroŭskim urehulavańni, stanovišču ŭ rehijonie Paŭdniovaha Kaŭkaza, u tym liku ŭ kantekście Ženieŭskich dyskusij pa biaśpiecy ŭ Zakaŭkaźzi. Zakranałasia taksama situacyja ŭ Biełarusi i Centralnaj Azii», — havorycca ŭ paviedamleńni.
Paśla padziej 19 śniežnia i admovy biełaruskich uładaŭ pradoŭžyć mandat ofisa ABSIE Hiermanija pačała abmiažoŭvać aficyjnyja kantakty ź Minskam. U pryvatnaści, anulavana zaprašeńnie ministru zamiežnych spraŭ Biełarusi Siarhieju Martynavu na Miunchienskuju kanfierencyju pa biaśpiecy (4–6 lutaha). Nie zmoža pajechać u Miunchien i ministr ekanomiki Mikałaj Snapkoŭ.
17 studzienia pasoł Biełarusi ŭ Bierlinie Andrej Hiro byŭ vyklikany ŭ MZS Hiermanii ŭ suviazi sa śćviardžeńniami, što raspaŭsiudžvajucca biełaruskimi dziaržaŭnymi ŚMI, ab datyčnaści FRH da sproby źviaržeńnia Alaksandra Łukašenki padčas śniežańskich prezidenckich vybaraŭ.
Pavodle infarmacyi radyjostancyi «Niamieckaja chvala», padčas sustrečy z Hiro ŭpaŭnavažanaja MZS FRH pa Uschodniaj Jeŭropie, Kaŭkazie i Centralnaj Azii Patrycyja Fłor zajaviła, što takija abvinavačańni absalutna biespadstaŭnyja. Jana znoŭ nahadała pra patrabavańnie ŭrada Hiermanii nieadkładna vyzvalić usich palitźniavolenych u Biełarusi i spynić sudovyja pracesy i represii suprać ich.
Fłor padkreśliła, što zbližeńnie Biełarusi ź Jeŭrasajuzam budzie mahčyma tolki pry zachavańni Minskam demakratyčnych pryncypaŭ i pravoŭ čałavieka. Pavodle jaje słoŭ, rašeńnie biełaruskaha kiraŭnictva zakryć minski ofis ABSIE źjaŭlajecca «novym udaram pa pravavoj sistemie i pravach čałavieka» ŭ Biełarusi.
