Sienatary Kiery i Libierman prapanavali piać krokaŭ u adkaz Łukašenku 6

Paśla vidavočna niespraviadlivych i niedemakratyčnych prezidenckich vybaraŭ 19 śniežnia aŭtarytarny kiraŭnik Biełarusi Alaksandr Łukašenka nahadaŭ svaim suajčyńnikam i ŭsiamu śvietu, što bačańnie svabodnaj i mirnaj Jeŭropy, jakoje skłałasia paśla chałodnaj vajny, tak i zastałosia niavykananym.

Na praciahu miesiaca ahienty Łukašenki źbivali, aryštoŭvali i zapałochvali apanientaŭ uładaŭ u sprobie padavić lubuju iskru niepadparadkavańnia.

Biełaruś jak kraina viedaje, što takoje pakuty: Chałakost źniščyŭ tut kvitniejučuju habrejskuju supolnaść, niekalki samych žorstkich bitvaŭ Druhoj suśvietnaj vajny adbylisia na terytoryi krainy, respublika pieražyła dziesiacihodździ aŭtarytarnaha kiravańnia savieckaj ułady, a ŭ 1986 tut vypała 70 adsotkŭ radyjoaktyŭnych apadkaŭ paśla avaryi na Čarnobylskaj AES. Pry hetym za 20 hadoŭ niezaležnaści paśla razvału Savieckaha sajuza biełarusy bačyli jak ichnija susiedzi, byłyja sacyjalistyčnyja Polšča i Litva, radykalna palepšyli ŭzrovień žyćcia, svabodna vybirali ŭładu i stali aktyŭnymi ŭdzielnikami Jeŭraźviaza i NATA.

Z prychodam da ŭłady ŭ 1994 h. Łukašenka ŭtrymlivaje kantrol, niejtralizuje i zapałochvaje svaich krytykaŭ. Jon i jahonyja nabližanyja kantralujuć telebačańnie, a ŭ 2008 jon vydaŭ zakon ab ŚMI, kab zakryć niezaležnuju presu i takim čynam zadušyć palityčnyja debaty. U Biełarusi niama svabody schodaŭ.

Tym nie mienš, navat pa standartach Łukašenki ŭzmacnieńnie žorstkaści mier paśla śniežańskich vybaraŭ adroźnivajecca represijami: bolš za 600 čałaviek byli aryštavanyja pravaachoŭnymi orhanami Biełarusi ŭ dzień hałasavańnia i paśla vybaraŭ. U ich liku byli žurnalisty, pradstaŭniki hramadzianskaj supolnaści, palityčnyja aktyvisty i navat 6 z 9 kandydataŭ u prezidenty, čatyry ź jakich zastajucca ŭ turmie. Zatrymanyja pa-raniejšamu nie majuć dostupu da siemjaŭ, advakataŭ, miedycynskaj dapamohi i adkrytaha rasśledavańnia, a ichnija svajaki i advakaty padviarhajucca pieraśledu z boku słužby biaśpieki Łukašenki.

Jeŭrapiejskija i amierykanskija čynoŭniki sprabavali supracoŭničać z uładami Biełarusi z 2008 hoda, spadziajučysia zaachvocić Łukašenku palepšyć mietady svajho kiravańnia i pieraduchilić dalejšuju izalacyju i pryhniot naroda. My vierym u karyść dypłamatyčnaha supracoŭnictva, ale kali adzin z bakoŭ pavaročvajecca śpinoj da prahresu, treba reahavać. Raźvićcio padziej paśla vybaraŭ u minułym miesiacy pakazvajuć miežy kantaktaŭ z Łukašenkam i pakazvajuć na nieabchodnaść novaha padychodu.

Situacyja ŭ Biełarusi patrabuje rašučaha i bieskampramisnaha adkazu ad usich bakoŭ. Palitviaźni, aryštavanyja biełaruskimi ŭładami, uklučajučy čatyroch kandydataŭ u prezidenty, pavinnyja być nieadkładna vyzvalenyja, i im pavinna być harantavana biaśpieka. Da taho času, pakul nie budzie pierakanaŭčych dokazaŭ, što heta adbyłosia, i nie budzie adnaznačna prademanstravana, što biełaruskija ŭłady surjozna staviacca da asnoŭnych pravoŭ svaich hramadzian, my prapanujem ažyćciavić nastupnyja piać krokaŭ:

Pa-pieršaje, naš urad i Jeŭrapiejski Źviaz pavinnyja prymianić adrasnyja sankcyi suprać biełaruskich čynoŭnikaŭ i ich paplečnikaŭ, uklučajučy zabaronu na ŭjezd i zamarožvańnie aktyvaŭ tych, chto adkazny za represii i parušeńni pravoŭ čałavieka;

Pa-druhoje, my zaklikajem Jeŭrapiejski Źviaz dałučycca da zabarony ZŠA na supracoŭnictva ź biełaruskaj dziaržaŭnaj naftavaj i naftachimičnaj kampanijaj Biełnaftachim, i zamarozić jaje rachunki, i pastupić hetak ža ź inšymi pradpryjemstvami, jakija ŭzbahačajuć Łukašenku i jahonych pasłuhačoŭ za košt biełaruskaha naroda.

Pa-treciaje, my prosim Jeŭrapiejski Źviaz skaracić prajekty, źviazanyja ź biełaruskimi ŭładami, i prypynić sustrečy ź biełaruskimi čynoŭnikami ŭ miežach prahramy Jeŭrapiejskaha Partniorstva. Zamiest hetaha my zaklikajem našych jeŭrapiejskich partnioraŭ dałučycca da našych namahańniaŭ pa pavieličeńni ŭzajemadziejańnia ź biełaruskim narodam, zabiaśpiečyć padvyšanuju i efiektyŭnuju padtrymku hramadzianskaj supolnaści Biełarusi.

Pa-čaćviortaje, my zaklikajem Klintan i Eštan praciahnuć ŭsiebakovaje ŭzhadnieńnie palityki SŠV i JEZ pa staŭleńni da Biełarusi.

Pa-piataje, my zaklikajem astatnich pradstaŭnikoŭ mižnarodnaj supolnaści, uklučajučy Rasieju, pryniać padobnyja metanakiravanyja dziejańni suprać kiraŭnictva Biełarusi.

Biełaruś moža i pavinna być kvitniejučaj i svabodnaj krainaj, jak i jejnyja susiedzi. Biełarusy pavinnyja viedać, što ŭ ciažkuju chvilinu ZŠA i Jeŭropa razam na ichnim baku. Łukašenka i jahony ŭrad treba prymusić zapłacić adčuvalnuju, sur`ioznuju canu za ich aŭtarytaryzm i represii. Kali ministry JEZ sustrenucca ŭ paniadziełak, kab abmierkavać temu Biełarusi, my spadziajemsia, što jany buduć razumieć, što pryjšoŭ čas dla pryncypovaha padychodu i dla rašučych dziejańniaŭ pa abodva baki akijana.

Džon Kiery — sienatar-demakrat ad štata Masačusiets, staršynia sienackaha kamiteta pa zamiežnaj palitycy.

Džo Libierman — niezaležny sienatar ad štata Kanektykut, staršynia sienackaha kamiteta nacyjanalnaj biaśpieki.

0

0

0

0

0

0

charter97.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH