Dziaržaŭtainśpiekcyja Biełarusi płanuje vykarystać psieŭdaabjomnuju darožnuju raźmietku, paviedamili va UDAI MUS.
Heta adna z navinak, praduhledžanych prahramaj «Uzajemarazumieńnie». Psieŭdaabjomnaja raźmietka ŭžo vykarystoŭvałasia ŭ ekśpierymientalnym paradku ŭ troch miescach na darohach Minska i Minskaj vobłaści. U dalejšym jaje miarkujecca nanosić pablizu piešachodnych pierachodaŭ, astraŭkoŭ biaśpieki i inšych miescaŭ, dzie najbolš vierahodnyja DTZ.
Jak rastłumačyli ŭ DAI, hety vid raźmietki nanosicca zvyčajnymi farbami biełaha, žoŭtaha i čyrvonaha koleraŭ. Adnak malunak robicca pad takim vuhłom, što stvarajecca trochmierny efiekt: ź miesca kiroŭcy zdajecca, što raźmietka nibyta prypadniataja nad darohaj. Kiroŭca mimavoli skinie chutkaść, ubačyŭšy takuju markiroŭku.
Prahrama «Uzajemarazumieńnie» była zapuščanaja DAI ŭ pačatku 2011 hoda. U jaje miežach płanujecca vykarystoŭvać takija inavacyi, jak simvaličnaja raźmietka «ziebra» ŭ padziemnych pierachodach, nalepki dla kiroŭcaŭ, jakija havorać pra ich hramadzianskuju pazicyju: «Ja zaŭsiody prapuskaju piešachodaŭ», «Ja nie padrezaŭ», «Ja nie parkujusia ŭ zialonaj zonie» i h.d.
Prahrama praduhledžvaje taksama aktyŭnaje pryciahnieńnie da vyrašeńnia mnohich prablem piešachodaŭ. Naprykład, zvaroty da ich buduć raźmiaščacca na košykach u supiermarkietach, na rekłamnych ščytach, u piešachodnych zonach.
Akramia taho, darožnaja milicyja padrychtavała bolš za 30 aŭdyjorolikaŭ dla radyjo, u jakich u dastupnaj formie raskazvajecca pra praviły darožnaha ruchu. Raspracavanaja taksama kamputarnaja prahrama pa darožnym ruchu dla dziaciej.
