Biełaruski moładzievy sieryjał Kurejčyka «Vyšej za nieba»: pieršyja kadry — videa 27

1 śniežnia, u Suśvietny dzień baraćby sa ŚNIDam, Prahrama raźvićcia AAN upieršyniu prastaŭlaje pieršyja kadry moładzievaj 8-sieryjnaj dramiedzi «Vyšej za nieba».

U sieryjale — historyja žyćcia i kachańnia minskaha studenta Mikity Mickieviča.

Dramiedzi — heta žanr kino, jaki spałučaje ŭ sabie rysy dramy i kamiedyi.

Sieryjał zdymajecca Prahramaj raźvićcia AAN u supracoŭnictvie ź Ministerstvam achovy zdaroŭja Biełarusi na srodki Hłabalnaha fondu dla baraćby sa ŚNIDam, suchotami i malaryjaj.

Stvaralniki nazyvajuć sieryjał "pieršym filmam pra sučasnych biełarusaŭ, stvorany vyklučna dla biełaruskaha rynku pryncypova siłami tolki biełarusaŭ".

Heta pieršy nacyjanalny moładzievy kinaprajekt, kažuć jany.

Aŭtaram scenaryja i kreatyŭnym pradziusaram vystupiŭ dramaturh Andrej Kurejčyk, aŭtar papularnych u rasijskim kinaprakacie filmaŭ «Luboŭ-markoŭ», " Luboŭ-markoŭ 2», «Juleńka», «Słužbovy raman. Naš čas «i inšych. Filmy pa jaho scenarach u sukupnaści sabrali bolš za 70 miljonaŭ dalaraŭ ZŠA ŭ prakacie. Režysior prajekta — Dźmitryj Marynin.

U roliku možna ŭbačyć dvuch hałoŭnych hierojaŭ filma: Leanida Paškoŭskaha, vykanaŭcu roli Mikity, i Vieraniku Barcevič, vykanaŭcu roli Juli.

U sieryjale taksama źnialisia maładyja ludzi, jakija prajšli narodny kastynh (a ŭ im uziali ŭdzieł tysiačy junych pretendentaŭ z usich rehijonaŭ Biełarusi).

Siarod tych, chto prajšoŭ žorstki adbor — repier Vincent.

U filmie taksama zdymajucca ŭžo pryznanyja akciory i dziejačy mastactva, jak Volha Niafiodava i Juryj Žyhamont.

A taksama zorki sportu: Alaksandra Hierasimienia i Siarhiej Štaniuk. Zorki biełaruskaj muzyki: Alaksandr Kulinkovič, Alaksandr Pamidoraŭ, Źmicier Vajciuškievič, Aleh Chamienka,

. Piśmieńniki Andrej Chadanovič, Tamara Lisickaja, Aleś Paškievič, skulptar Aleś Šaternik.

Stvaralniki filma staviać pierad saboj zadaču «sumlenna pakazać zrez biełaruskaj moładzi, adlustravać realii ajčynnych kulturnych pracesaŭ».

Aŭtary tak padajuć siužet «Vyšej za nieba»:

«Hałoŭny hieroj — lidar modnaha hurta Mikita Mickievič. Mikita charyzmatyčny, razumny, žyvie pavodle svaich pryncypaŭ i nie hatovy imi achviaravać dziela hrošaj. Jon śmieły i stylovy — sapraŭdnaja ikona dla dziaŭčatak i ŭzor dla chłopcaŭ.

Mikita atrymlivaje zadavalnieńnie ad svajho žyćcia i viedaje, što hety śviet vydatny. Mikita zmahajecca za lidarstva z vakalistam jaho hurta Stasikam, jaki ŭjaviŭ siabie „zorkaj“. Hurt bolej na baku Mikity. Ale tut adbyvajecca padzieja, jakaja pieravaročvaje ŭsio jahonaje žyćcio».

Hieroi sieryjała buduć razmaŭlać i pa-biełarusku, i pa-rasijsku. Pavodle słovaŭ aŭtaraŭ, taki pryjom «upieršyniu vykarystany» ŭ sieryjale, kab maksimalna nablizić film da biełaruskich realij.

Premjera sieryjała maje adbycca 14 lutaha 2012.

SM

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH