Viadoma, samaje hałoŭnaje — heta «pravilnaja», bolš vadkaja i tamu bolš prydatnaja dla zimy aliva, a taksama dobry akumulatar. Ale mała chto, pačuŭšy prahnoz nadvorja, pačynaje terminova źmianiać alivu i zaradžać akumulatar. Tamu dla bolšaści zastajecca niekalki praściejšych dziejańniaŭ, jakija taksama mohuć dapamahčy. Raniej było pryniata raić zabirać akumulatar na noč u kvateru. U hetaha receptu jość nievialiki minus: kali ŭ dźviarach mašyny elektrazamki, skarystacca imi ranicaj nie atrymajecca. Kab hetaha nie adbyłosia, daviadziecca nie tolki zdymać akumulatar, ale i lić u zamočnyja śvidraviny śpiecyjalny sastaŭ, da čaho ŭładalniki elektrazamkoŭ nie pryvučanyja (da taho ž dzie harantyja, što jon nie budzie padrobkaj, jak bolšaść «niezamiarzajek» dla łabavoha škła?).
Možna zrabić praściej: nie zdymać akumulatar, a prosta pierad zapuskam prahreć jaho, na niekalki siekund uklučyŭšy dalniaje śviatło. Miera heta davoli dziejsnaja. I jašče, kab nie pierahružać akumulatar, nie zabycca padčas pusku nacisnuć na piedal sčapleńnia.
Niejtralnaha stanovišča ryčaha ŭ skryncy tut mała: bo pry adpuščanaj piedali matoru daviadziecca krucić i kiravany dysk, i vały ŭ skryncy. I navat paśla taho jak ruchavik zavioŭsia, maje sens niekatory čas patrymać nahu na sčapleńni — kali rezka adpuścić, moža zahłuchnuć i, pa zakonie podłaści, bolš nie zavieścisia.
Nie treba krucić startar zanadta doŭha — lepš dać akumulataru adpačyć, a potym paŭtaryć apieracyju. I apošniaja z prostych paradaŭ, jakija nie patrabujuć šmat času i hrošaj — kupić admysłovy sprej dla zapusku ruchavika. Niekatoryja rajać raspylać jaho prosta ŭ karbiuratar, ale, jak viadoma, nie ŭ kožnaj mašyny jon jość, a dapamahaje i raspyrskvańnie kala ŭvachodnaj adtuliny pavietranaha filtra.
