U internecie źjaviłasia videa, jakoje paćviardžaje zajavu hrupy šviedaŭ ab ažyćciaŭleńni śmiełaj akcyi salidarnaści ź biełaruskimi dysidentami.
Na hetym videa vyrazna vidać samalot. Jon kružlaje nad carkvoj i budynkam.Jany paznavalnyja: heta carkva Śviatoj Jefrasińni Połackaj u Iviancy i budynak na centralnaj płoščy hetaha miastečka ŭ Vałožynskim rajonie.
Ivianiec znachodzicca prykładna za 120 km ad litoŭskaj miažy, 50 km ad Minska.Na videa vidać, jak ź nieba spuskajucca miadźviedziki na parašucikach. Na placy iduć ludzi,
Vyhlad samalota supadaje z tym, jaki źjaviŭsia na fotach u šviedskaj presie — jakija, jak śćviardžajecca, byli zroblenyja napiaredadni vyletuz-pad Kaŭnasa.
Druhoje videa było zroblenaje z samalota.
Žychary Ivianca masava paćviardžajuć, što bačyli samalot i pakiety ź miadźviedzikami.
Videa vyhladajuć praŭdzivymi, adnak zastajecca pytańniem, adkul prylataŭ samalot: ci sapraŭdy ź Litvy.
Siońnia Ministerstva abarony Biełarusi zajaviła, što nijakich nieapaznanych samalotaŭ u biełaruskaj pavietranaj prastory 4 lipienia nie źjaŭlałasia.
Bolšaść ŚMI paličyła, što zajavy šviedaŭ byli pijaram.
Kali paćvierdzicca, što šviedy sapraŭdy pranikli ŭ pavietranuju prastoru Biełarusi, heta budzie najbolšy skandał u SPA ad časoŭ palotu niemca Matyjasa Rusta.Jon pryziamliŭsia na Krasnaj płoščy ŭ Maskvie, što vyklikała čaradu adstavak u savieckim vajskovym viedamstvie.
Biełaruskija ŭłady nie raz zajaŭlali, što nadziejna zakryvajuć pavietranuju prastoru na zachodnich rubiažach Rasii.
U dziejańniach šviedaŭ sapraŭdy była niemałaja ryzyka. Jašče pamiatnaja historyja, jak biełaruskaja SPA źbiła pavietrany šar, što vypadkova zalacieŭ na biełaruskuju terytoryju z Polščy. Pavietrapłaŭcy tady zahinuli.
Nahadajem, što šviedskija ŚMI śćviardžajuć: hrupa šviedaŭ z ryzykaj dla žyćcia praviała śmiełuju akcyju ŭ padtrymku biełaruskaha ruchu za svabodu.Stakholmskija vydańni pišuć, što junaki pajšli dalej za Matyjasa Rusta. Jany nie prosta abyšli biełaruskuju supraćpavietranuju abaronu na nastupny dzień paśla paradu Dnia Niezaležnaści, ale i skinuli na ranišni Minsk 800 cacak. Da plušavych miadźviedzikaŭ byli pryčepleny łozunhi ŭ padtrymku svabody.
Šviedy śćviardžajuć, što kala 5.00 ranku — niajasna, stakholmskaha ci biełaruskaha času — skinuli cacki ŭ rajonie rezidencyi Alaksandra Łukašenki.
Paźniej u sieradu šviedy raspaŭsiudzili foty, nibyta zroblenyja ŭ časie akcyi ich siabrami na miescy padziei. Adnak ni na adnym ź ich nie vidać Minsk.
Metaj akcyi była padtrymka demakratyčnych pracesaŭ u Biełarusi. Chto kankretna jaje zadumaŭ — nie ŭdakładniajecca.
Zarehistravany ŭ Šviecyi samalot, jak śćviardžajecca, vylecieŭ z terytoryi susiedniaj Litvy i biez dazvołu pranik u pavietranuju prastoru Biełarusi.Startavaŭ jon z aeradroma ŭ Pačunach (Pačunaj) kala Koŭna. Šviedy kažuć, što bajalisia, kab samalot nie byŭ źbity biełaruskaj SPA. Adnak niekalkihadzinny palot zaviaršyŭsia biez zdareńniaŭ.
«Nie viedaju, ci zasiakli nas radary.
My lacieli na małoj vyšyni», — adznačaje piłot.
Pavodle infarmacyi haziety Aftonbladet, akcyja była arhanizavana pry finansavaj padtrymcy rekłamnaha ahienctva Studio Total. U minułym heta ahienctva mieła dačynieńnie, u pryvatnaści, da akcyi ŭ padtrymku pravoŭ žančyn: jano vydała fieministkam hrošy (100 tysiač kron), jakija jany spalili ŭ znak pratestu suprać dyskryminacyi žančyn pa zarobkach.
Pieršapačatkova šviedy źbiralisia skinuć na Minsk ulotki, ale paśla spynilisia na cackach.
Ideja akcyi šviedam mahła pryjści pad uražańniem pierformansu biełaruskaj hrupy moładzi «Zmiena».U lutym były palitviazień Pavieł Vinahradaŭ i jahonyja siabry arhanizavali «Mitynh cacak»: pierad uvachodam u Mienski harvykankam. Tam byli źmieščany plušavyja cacki z nadpisami, źviernutymi da biełaruskich uładaŭ: u pryvatnaści, «Dzie svaboda słova?» i «Alechandra! Adpuści ludziej». Apošni nadpis tyčyŭsia palitviaźniaŭ. Ułady tady žorstka pakarali arhanizataraŭ akcyi «Cacki mitynhue»: usie jany atrymali administracyjnyja terminy. Infarmacyja pra kreatyŭnuju akcyju i reakcyju na jaje ŭładaŭ prajšła ŭ suśvietnych ŚMI. «U Minsku aryštavali cacki», pisali haziety.
Varta adznačyć, što Šviecyja paśladoŭna padtrymlivajuć ruch nacyjanalnaha vyzvaleńnia ŭ Biełarusi.U pryvatnaści, jany dapamahajuć adzinamu biełaruskamoŭnamu telekanału «Biełsat» i EHU.
Hazieta Aftonbladet — adna z samych papularnych u Šviecyi.
Vydańnie śćviardžaje, što viedała pra padrychtoŭku akcyi zahadzia.«Nam padabajecca ideja zmahańnia z dyktatarami z dapamohaj humaru. Najhoršaje dla dyktatara — kali ź jaho śmiajujuca», — skazali šviedy ŭ intervju haziecie pierad vyletam. Jany pryznavalisia, što bajacca, bo samalot mohuć źbić abo prymusova pasadzić, a ich — zatrymać. Ale «žurnalisty i dysidenty ŭ hetaj krainie žyvuć pry štodzionnaj ryzycy źniavoleńnia» i «my chacieli, kab śviet źviarnuŭ uvahu na hetych ludziej».
Imia piłota i jahonaha spadarožnika nie paviedamlajecca pa jahonaj prośbie, ź mierkavańniaŭ biaśpieki.
