Pra hierojaŭ zbornika narysaŭ Tamkoviča zvyčajna kažuć «čałaviek z aktyŭnaj pazycyjaj».
«Kod supracivu — heta tyja ludzi, jakija zmahajucca z arytmijaj. Jany jak leki dla hramadctva suprać hetaj arytmii. U ich jość niejki kod supracivu ŭnutry. Jany nie prymajuć chłuśniu, jakaja siońnia ŭsio saboj zapoŭniła»,- tłumačyć nazvu knihi aŭtar.
Siarod hierojaŭ knihi:
Kiraŭnik fondu «Dzieciam Čarnobyla» Hienadź Hrušavy. Za 20 hod dziejnaści fondu bolš za 300 tysiač dziaciej z zabrudžanych rajonaŭ azdaravilisia za miažoj.
Staršynia zhurtavańnia biełarusaŭ śvietu «Baćkaŭščyna» Alena Makoŭskaja. U ramkach kampanii «Budźma biełarusami!» aktyvisty «Baćkaŭščyny» razam sa svaimi prychilnikami robiać amal tysiaču kulturnickich imprezaŭ u hod.
Staršynia dobraachvotnaha tavarystva achovy pomnikaŭ Anton Astapovič. Jahonaja arhanizacyja skłała dakumtntacyju na sotni abjektaŭ spadčyny i prapanavała Ministerstvu kultury ŭklučyć ich u śpis
historyka-kulturnych kaštoŭnaściaŭ.
«Praz moj dyktafon za apošnija hadoŭ piać prajšli bolš za 300 čałaviek, — raskazvaje Alaksandar Tamkovič. — Ja nie prydumlaŭ siužetaŭ. Ja nie piśmieńnik. Ja žurnalist. Ja prosta ŭklučaju dyktafon i słuchaju. A im jość što raskazać».
Adzin z hierojaŭ knihi — namieśnik staršyni Biełaruskaha kanhresu demakratyčnych prafsajuzaŭ Siarhiej Antusievič. Jon ličyć, što «Arytmija, albo kod supracivu» — heta encykłapiedyčny daviednik pa sučasnaj historyi:
«Ja dumaju, što dla našych naščadkaŭ heta budzie historyja i prykład taho, jak pražyvali hetyja časy my. Kaliści heta budzie historyjaj»,- skazaŭ Siarhiej Antusievič.
Kniha vydadzienaja pra dapamozie Mižnarodnaha kansorcyuma «JeŭraBiełaruś».
Prezientacyja adbudziecca 26 vieraśnia, a 17.00 u Halerei sučasnaha mastactva «Ŭ» (pr. Niezaležnaści, 37a). U jakaści viadučaj vystupić narodnaja artystka Biełarusi Zinaida Bandarenka.
