Siońnia vykankam Biełaruskaj fiederacyi futboła zaćvierdziŭ imia novaha hałoŭnaha treniera nacyjanalnaj kamandy. Im staŭ słavuty biełaruski paŭabaronca Alaksandr Chackievič.
«Dynama» Minsk, «Dynama» Kijeŭ
Ad pačatku jon byŭ vychavancam minskaj dynamaŭskaj SDIUŠAR-5 i 14 hadoŭ svajoj karjery futbalista vystupaŭ za bieła-błakitnyja kamandy: z 1992 pa 96 za minskuju, da 2003 — za kijeŭskuju. Dalej była vandroŭka ŭ Kitaj i Łatviju, a paśla znoŭ viartańnie da alma-matar — karjeru hulca Alaksandr skončyŭ u rodnym minskim «Dynama» ŭ 2007-m.
Ź jahonym imiem źviazanyja samyja hučnyja pośpiechi abiedźviuch dynamaŭskich kamandaŭ: piać čempijonstvaŭ Biełarusi zapar u składzie «Dynama» Minsk, a paśla ŭžo vystup u paŭfinale Lihi čempijonaŭ u składzie lehiendarnaj kijeŭskaj kamandy pad kiraŭnictvam Valera Łabanoŭskaha.
Chackievič źjaŭlajecca adnym z hałoŭnych architektaraŭ hetych dasiahnieńniaŭ razam ź jašče adnym biełarusam — niabožčykam Valancinam Bialkievičam.
Z «Dynama» źviazanaja i važnaja častka trenierskaj karjery Alaksandra. Jašče ŭ tym samym 2007 hodzie ŭ Minsku jon pačaŭ trenierskuju karjeru, zrabiŭšysia adnym ź niešmatlikich hulajučych trenieraŭ u historyi našaj krainy. Rezultaty akazalisia, skažam tak, nie vielmi dobrymi — pad kiraŭnictvam Chackieviča «Dynama» skončyła čempijanat na rekordna nizkim dla siabie dziaviatym miescy, što vyliłasia ŭ adstaŭku śpiecyjalista.
A z 2010 hoda i da siońniašniaha momantu jon pracavaŭ z moładzievym składam užo kijeŭskich dynamaŭcaŭ. Razam atrymlivajecca, što Chackievič 20 sa svaich 41 hod addaŭ «Dynama» – litaralna pałovu žyćcia. Tamu vidavočna, što pačesnaje miesca ŭ historyi bieła-błakitnych Chackievič sabie zareziervavaŭ daŭno.
Padazravaŭsia ŭ zdačy matča
U adbory da Čempijanatu śvietu ŭ Japonii i Karei 2002 hoda nacyjanalnaja zbornaja Biełarusi pad kiraŭnictvam lehiendarnaha Eduarda Małafiejeva trapiła ŭ adnu hrupu z Ukrainaj. Taksama ŭ hetaj ža hrupie apynulisia Uels i Polšča. Mienavita tady ŭ Biełarusi byli najlepšyja šansy na vychad u finalnuju častku mundyala. U apošnich dvuch matčach adbora naša zbornaja sustrakałasia doma z Ukrainaj i na vyjeździe z Uelsam. Hulniu suprać paŭdniovych susiedziaŭ našyja prajhrali ź likam 0:2, a Chackievič i Bialkievič byli zamienienyja pa chodzie hulni.
Hałoŭny trenier nacyjanalnaj kamandy abvinavaciŭ chłopcaŭ, jakija na toj momant źjaŭlalisia hulcami kijeŭskaha «Dynama» ŭ tym, što jany «zdavali» hety matč: maŭlaŭ, im u Kijevie pastavili takuju ŭmovu.
Zatym była fiejeryčnaja damašniaja pieramoha nad pieramožcami hrupy — palakami ź likam 4:1 (tady Raman Vasiluk aformiŭ kare). A na hulniu suprać Uelsa Chackieviča ź Bialkievičam navat nie ŭziali. Zbornaja prajhrała valijcam ź likam 0:1, što pazbaviła jaje pajezdki na čempijanat śvietu.
Chackievič ža apisvaŭ hetuju situacyju nastupnym čynam: «Usio było pa-sumlennamu, my z Valikam hulniu nie zdavali. Navat paśla taho matča z Ukrainaj zastavaŭsia šaniec: kali b my abyhrali zbornuju Uelsa, harantavana traplali b u płej-of. Choć Eduard Vasiljevič i skazaŭ nam, što ŭkraincy z palakami ŭžo damovilisia. Ale jany zhulali ŭničyju 1:1, a my paciarpieli parazu. Zrešty, hety matč zbornaja pravodziła ŭžo biez nas z Valikam. Małafiejeŭ zamianiŭ mianie tady paśla pieršaha tajma, a Valancina na 60-j chvilinie. I skazaŭ, što z nami ŭ Uels jon nie pajedzie. Što było rabić kiraŭnictvu fiederacyi paśla takoha ultymatumu? Zrazumieła, jano stała na bok treniera. Choć na nastupny dzień my pryjechali na bazu i pasprabavali pahavaryć z Eduardam Vasiljevičam. Usio ž taki nie chaciełasia vypuskać šancu trapić na čempijanat śvietu. My ž jašče pierad hulnioj z Ukrainaj skazali Małafiejevu: «Kali vy nam nie daviarajecie, to lepš nie staŭcie. A kali stavicie, to pytańniaŭ potym nie zadavajcie».
Minimum vopytu na ŭzroŭni zbornych
U jakaści treniera Chackieviču daviałosia papracavać nie tolki i ŭ minskim i kijeŭskim «Dynama» dy «Viciebsku». Jakraz pamiž pieršym trenierskim vopytam u biełaruskaj stalicy i pajezdkaj na poŭnač našaj krainy znajšłosia miesca dla pracy ŭ moładzievaj zbornaj Biełarusi U18. Asablivych pośpiechaŭ kamanda nie zdabyła, tamu i prabyŭ na pasadzie jaje hałoŭnaha treniera Chackievič tolki hod.
A ŭ 2010—11 Alaksandr pracavaŭ u jakaści asistenta Mirona Markieviča, a paśla i Juryja Kalitvincava ŭ składzie nacyjanalnaj zbornaj Ukrainy.
Chvareŭ na hiepatyt
Jašče padčas svajoj futbolnaj karjery Chackieviču daviałosia pieranieści hiepatyt V. Chvarobu jon padchapiŭ razam ź jašče adnym viadomym biełaruskim futbalistam Siarhiejem Štaniukom, kali minskaje «Dynama» była ŭ tury pa Paŭdniovaj Amierycy ŭ 1995 hodzie. Hulcam daviałosia prapuścić surjozny adrezak času, kab całkam vyzdaravieć i viarnucca ŭ formu. Ale i ciapier biez uvahi ŭžo minułuju chvarobu pakidać nielha: «Raz u dva miesiacy ja prachodžu admysłovaje abśledavańnie. Na dadzieny momant usie funkcyi piečani ŭ paradku, tak što z hetym nijakich prablem», — kaža Chackievič.
Pasada hałoŭnaha treniera — heta vialiki krok napierad dla Alaksandra Chackieviča. Chočacca vieryć, što lehienda biełaruskaha futbołu ŭ jakaści futbalista vydatna prajavić siabie i na trenierskaj pasadzie.
Rybak i siemjanin
Alaksandr Chackievič lubić parybačyć. Darečy, u ciapierašniaj zbornaj toje samaje chobi majuć Alaksandr Hleb, Siarhiej Karnilenka, Cimafiej Kałačoŭ, Siarhiej Černik.
A što siamja? Chackievič — čałaviek stabilny. Sa svajoj žonkaj Iłonaj jany paznajomilisia jašče bolš za 20 hadoŭ tamu. Na pieršaje spatkańnie Chackievič pryjšoŭ u spartyŭnym kaściumie zbornaj SSSR – chacieŭ stvaryć uražańnie. Udałosia — jany z žonkaj hadujuć dvoch synoŭ, Uładzisłava i Arcioma.
