Pa słovach abaroncy, sud admoviŭsia dałučyć da spravy materyjały, jakija dakazvajuć ahučanyja Viktaram Babarykam dovady pra toje, što kryminalny pieraśled u dačynieńni da jaho nie mieŭ mety raskryćcia realnaha złačynstva, a byŭ skiravany na toje, kab pieraškodzić jamu ŭ vykazvańni palityčnaha mierkavańnia i ŭdziele ŭ vybarach prezidenta, piša Tut.by.
«Svaju pazicyju Viktar Babaryka, vystupiŭšy 6 krasavika na pasiadžeńni, abhruntavaŭ kankretnymi faktami ab tym, što pačatak i pośpiechi jaho vybarčaj kampanii pa časie supadajuć z reakcyjaj słužbovych asob i pravaachoŭnych orhanaŭ, jakaja pryviała da raspačynańnia kryminalnaj spravy i źmiaščeńnia jaho pad vartu. Ale dokazy hetych faktaŭ sud u spravie bačyć nie zachacieŭ. Choć jość naŭprostavaja norma, jakaja abaviazvaje sud dałučać da spravy materyjały, sabranyja abaronaj».
Taksama, kaža abaronca, sud admoviŭsia vyklikać u pasiadžeńnie dvuch hramadzian Łatvii, jakija nieadnarazova zhadvajucca ŭ abvinavačvańni jak asoby, praź jakich nibyta Viktar Babaryka ździajśniaŭ inkryminavanyja dziejańni. Havorka idzie pra Alaksandra Rastaŭsa i Alaksieja Ściapanaŭsa, jakija fihurujuć u abvinavaŭčym zaklučeńni jak kiraŭniki zamiežnych kampanij, nibyta padkantrolnych Babaryku.
«Padčas papiaredniaha śledstva hetyja hramadzianie dapytanyja nie byli. Ich pakazańniaŭ u spravie niama. Raniej admova vyklikać ich matyvavałasia tym, što nibyta adsutničajuć źviestki ab ich adrasach, a taksama što nibyta pradprymalisia miery dla ich dopytu šlacham nakiravańnia prośby ab mižnarodna-pravavoj dapamozie.
Ciapier my ŭžo ŭ treci raz chadajničali ab vykliku hetych ludziej: my znajšli ŭ nietrach 122-ch tamoŭ spravy pašpartnyja dadzienyja i adrasy hetych hramadzian, a taksama padali normu mižnarodnaj damovy pra mahčymaść vykliku hetych hramadzian niepasredna sudom. I hałoŭnaje — my pakazali, što prośby ab mižnarodnaj dapamozie nakiroŭvalisia naohuł nie pa hetaj spravie, što hetyja prośby nakiroŭvalisia nie sudom, i što ŭ ich pytańnie ab vykliku hramadzian u sud abo ab uručeńni im pozvy navat nie staviłasia. Ale vyklikać ich sud admoviŭsia. Dobra, što zakon dazvalaje nam u hetaj situacyi zajavić ab niedakazanaści abstavin, ukazanych u abvinavačvańni ŭ suviazi ź imionami hetych hramadzian».
Taksama abaronie, pa słovach Łajeŭskaha, udałosia dałučyć da spravy vyklučna važnyja novyja dokazy, sabranyja imi za miežami Biełarusi.
- Hetyja dakumienty abviarhajuć klučavyja dovady abvinavačvańnia ab tym, što: 1) nibyta Viktaru Babaryku była padkantrolnaja łatvijskaja kampanija, jakaja ŭvajšła ŭ pačatku 2005 hoda ŭ skład udzielnikaŭ biełaruskaj kampanii, jakaja realizuje sumiesny prajekt z «Biełhazprambankam»; 2) nibyta pastupajučyja ŭ łatvijskuju kampaniju dyvidendy ad biełaruskaj kampanii takim čynam byli «pryniatyja» Viktaram Babarykam u jakaści chabaru. My pakazali, što zasnavalnikam łatvijskaj kampanii i členami orhanaŭ jaje kiravańnia byli subjekty, nie prosta nijak nie źviazanyja ź Viktaram Babaryka, ale navat ni razu nie zhadanyja nikim u hetym kryminalnym pracesie. I pakazali, što dyvidendy ŭ łatvijskuju kampaniju nijakaha dačynieńnia da Viktara Babaryki nie mieli».
Źmicier Łajeŭski raspavioŭ «Radyjo Svaboda», što havorka idzie pra aryhinały dakumientaŭ ź piačatkami i podpisami łatvijskich aficyjnych asob.
«My dastaŭlajem ich u sud, i prakuror kaža: moža być, vy znajšli hetyja dakumienty na vulicy. Pry hetym abvinavačańnie spasyłajecca na niekatoryja dakumienty ŭ materyjałach spravy, na jakich niama ni podpisu, ni piačatki. Heta adzin z prykładaŭ taho, što adbyvajecca pa-za razumieńniem zvyčajnaha zdarovaha čałavieka.
Dla Babaryki jak vysokaadukavanaha i vysokakulturnaha čałavieka heta dzika i dziŭna. Ale ŭ jaho ŭsio jašče jość pačućcio humaru, i heta ratuje».
Łajeŭski kaža, što ŭ boku abarony jość jašče šerah vartych uvahi faktaŭ na karyść nievinavataści Viktara Babaryki.
«Abvinavačvańnie začytvali šmat dzion, potym šmat dzion doŭžylisia dopyty i jašče bolš — vyvučeńnie dakumientaŭ. Usio heta stvaraje iluziju ab tym, što jość niejkaje składanaje złačynstva i niejkija jaho dokazy. My prostymi słovami patłumačym, čamu abvinavačvańnie biespadstaŭnaje».
21 červienia ŭ 10.00 pačynajucca sudovyja sprečki pa «spravie Biełhazprambanka».
