Charkaŭskija vałanciory biaruć šlub. Fota: AP
Ministerstva justycyi Ukrainy spraściła praceduru zaklučeńnia šlubu padčas vajennaha stanovišča. Z hetaha času heta možna zrabić na praciahu adnaho dnia paśla zajavy i navat praz Zoom.
Pra heta paviedamiła namieśnica ministra justycyi Valeryja Kałamijec.
«Siońniašnija abstaviny pryvodziać da taho, što ŭ ludziej časam niama mahčymaści čakać. Tamu što ŭsie my apynulisia ŭ abstavinach, kali my nie viedajem, što budzie zaŭtra i navat siońnia ŭviečary. Tamu padać zajaŭku i aficyjna aformić šlub ciapier možna za dzień. Ludzi, jakija vykazali žadańnie, mohuć ažanicca na praciahu dnia», — patłumačyła Kałamijec.
Rehistracyja šlubu moža adbyvacca ŭ lubym orhanie ZAHSa na terytoryi, dzie nie viaducca bajavyja dziejańni. U peŭnych umovach mohuć rehistravać šluby nie tolki rabotniki orhanaŭ ZAHS, ale i palicyjanty, i vajskoŭcy. Heta aktualna dla zakachanych, jakija niasuć słužbu. Kałamijec adznačyła, što dla abaroncaŭ taksama praduhledzieli dystancyjny šlub.
«Jany mohuć źviarnucca da svajho kamandzira i padać zajavu ab tym, što chočuć ažanicca dystancyjna. Takim čynam, zarehistravać šlub možna navat tady, kali muža ci žonki niama fizična. Čałaviek, jaki nie znachodzicca ŭ vajskovaj častcy, moža być padłučany dystancyjna. I navat abodva z pary mohuć być padłučanyja dystancyjna, prosta praz Zoom», — skazała Kałamijec.
Z pačatku poŭnamaštabnaj vajny pabralisia šlubam amal 22000 ukrainskich par, heta bolš, čym zvyčajna.
