Sudovaje pasiadžeńnie prachodziła ŭ adkrytym režymie, ale nie ŭ pamiaškańni suda, a ŭ adździele milicyi Leninskaha rajona horada, paviedamlaje «Viasna».
Spravu razhladała sudździa Volha Sierakova, dziaržabvinavaŭca — Zoja Alaksiucina.
Alaksandra Šaciłu zatrymali 10 sakavika 2022 hoda na troje sutak, a zatym da suda źmianili miru strymańnia na padpisku ab niavyjeździe.
Pa materyjałach abvinavačańnia, Alaksandr Šaciła, majučy namier i žadańnie, skiravanyja na publičnuju abrazu staršaha ŭčastkovaha inśpiektara adździeła ŭnutranych spraŭ Pružanskaha rajvykankama majora S. Kalady, a taksama jaho kalehi — lejtenanta Dźmitryja Tarazieviča, 15 lipienia 2020 hoda ŭ sacyjalnaj sietcy «Adnakłaśniki» pad publikacyjaj z vyjavami nazvanych supracoŭnikaŭ milicyi ŭ formiennym abmundziravańni i nadpisam «Heta my prymianili ŭdušalny pryjom suprać mirnych hramadzian u Pružanach» raźmiaściŭ abraźlivy i źniavažlivy kamientaryj, pryniziŭ tym samym ich honar i hodnaść.
Abvinavačany Šaciła svaju vinu pryznaŭ całkam, pryznaŭsia, što pakinuŭ kamientaryj pad upłyvam emocyj. Paźniej zrazumieŭ, što aŭtar publikacyi znachodzicca za miežami Respubliki Biełaruś.
Sud pastanaviŭ pryznać Šaciłu vinavatym i pryznačyŭ jamu pakarańnie ŭ vyhladzie abmiežavańnia voli terminam na adzin hod i 6 miesiacaŭ biez nakiravańnia va ŭstanovu adkrytaha typu.
Taksama sud zadavoliŭ materyjalnyja patrabavańni paciarpiełych supracoŭnikaŭ milicyi Kalady i Tarazieviča ab kampiensacyi maralnaj škody ŭ pamiery pa 1000 rubloŭ kožnamu.
Telefon Xiaomi, z dapamohaj jakoha byŭ pakinuty abraźlivy kamientaryj, kanfiskavany ŭ dachod dziaržavy.
